422/2024-2025

2024 Ṭomir thla ni 6: Lok Sabha Inthlanpui 2024 neih zawh taka Lawngtlai District chhunga kum 100 chuanga upa vote thlakte hnena chawimawina pek tura ruahman chu Pu Thanglianhluma, kum 104, Lawngtlai College Veng hnenah vawiin khan hlan a ni.

Lawngtlai District Election Officer Pu Cheemala Siva Gopal Reddy ruahmannain Lawngtlai District chhunga kum 100 chuanga upa Lok Sabha Inthlanpui 2024-a vote thlakte chu chawimawina thuziak leh ngaihhlutna thilpek (rice cooker) hlan ni se, tih a ni a. Hemi bawhzui hian April ni 19, 2024-a 37/17-College Veng South, Lawngtlai polling station-a vote thlak Pu Thanglianhluma chu vawiin khan Election Officer Pu Denny Lalchhuanawma leh DIPRO & SVEEP Nodal Officer Pu C. Lalhruaitluanga te'n an inah kal chilhin chawimawina thuziak leh ngaihhlutna thilpek hi an hlan a ni.

Lawngtlai District chhungah hian kum 100 chuanga upa vote thlak pahnih an awm a. Pakhat zawk chu Pi Famiangi, kum 116, Pangkhuaa mi niin, kum upate tana in lama vote thlak theihna (home voting) ruahmanah vote a thlak a. Ani pawh hi remchang hmasaah chawimawina thuziak leh ngaihhlutna thilpek hi hlan tura ruahman a ni.