4640/2023-2024
1-Mizoram (ST) Parliamentary Constituency hnawhkhahna atana General Election to the Lok Sabha, 2024 nei tura inpuahchahna chuan a vawrtawp a thleng ta a, Polling Station 1,276 a inthlan buaipuitu tur, Polling party-te pawh inpeihfel tawhin P-2 Polling Station 168 (Polling Station lam hla deuh) a duty turte chu vawiin hian an chhuak fel a, Naktukah P-1 Polling Station 1108 a duty turte an chhuak veleh ang, vote thlak ni a duty tur Polling Official ruat mi 5,071 an awm a ni.
Electoral Roll thar berin a tarlan danin Mizoramah vote nei mi 8,56,364 an awm a; heng zinga 4,14,805 hi mipa niin, hmeichhia 4,41,559 an awm a, Service voters 4,963 (Mipa - 4872, Hmeichhia - 91) an awm bawk. Kum 85 chunglam voters 4741 (Mipa - 2167, Hmeichhia - 2574) awmin PwD voters 3397 (Mipa - 1876, Hmeichhia - 1521) an awm a, young voters kum 18-19 mi 36,370 (Mipa - 18,659, Hmeichhia - 17,711) an awm bawk a ni.
Polling Station 1276 zingah hian Thingtlang (Rural) Polling Station 751 leh Khawpui (Urban) Polling Station 525 a awm a, Polling Station hi hmun hrang hrang 1166 ah siam a ni a. Chawhrualin Polling Station pakhatah voter 671 zel an awm a, Polling Station 765 ah Polling Booth-a chet vel na te webcasting kal tlanga vil a ni dawn bawk.
Vulnerable Polling Station 14 (Kolasib District - 7, Aizawl District - 3, Champhai District - 4), Critical Polling Station 5 (Saitual District vek), Lirthei luh lohna, ke a pan ngai Polling Station 11 (Mamit District - 6, Lunglei District - 4, Lawngtlai District - 1) leh Lawngleng hmanga pan ngai Polling Station 15 (Lunglei District - 13, Mamit District - 2) a awm bawk.
Model Polling Station hi Mizoram pumah 25 awmin Auxilliary Polling Station hi Lunglei District-ah 4 a awm a, All Women Managed Polling Station (Pink Polling Station) 136, All Youth Managed Polling Station 7 leh PwD Managed Polling Station 1 a awm anga, Vote thlak niah mipui ten nuam tak leh hahdam taka vote an thlak theih nan Assured Minimum Facility (AMF) hmangin hma lak vek a ni bawk.
Tun inthlanpui atana vote nei awm tamna ber chu Aizawl District niin voters 2,88,304 (Mipa - 1,34,838 leh Hmeichhia - 1,53,466) an awm a, vote nei awm tlemna ber District chu Hnahthial District niin voters 16,223 (Mipa - 8008 leh Hmeichhia - 8215) a ni.Polling Station-a elector tamna ber chu Zemabawk-VIII (Aizawl District) niin elector tlemna ber chu Thehlep (Lunglei District) a ni.
Tun dinmunah inthlan duty tur leh EVM/VVPAT khawl indaih loh na a awm lova, EVM bakah ah VVPAT (Voter Verifiable Paper Trail) hi Polling Station 1276 ah hman a ni leh dawn a. Tun tum inthlanpuiah hian ECIL siam M3 Model thar ber Ballot Unit 1994, Control Unit 1958 leh VVPAT 2088 hman a ni ang.
Vote thlak zawhfel hnu a EVM dahna tur Strong Room chu District tinah ruahman fel vek tawh a ni a. Strong Room hi 40 (Assembly Constituency tin tan pakhat theuh) awmin Central Armed Police Forces (CAPF) ten Strong Room kawngkhar bulah chhunzan zawmin an veng ang a, Mizoram State Armed Police te pawhin Strong Room awmna building hi chhunzan zawmin an veng dawn bawk a ni.
Venhimna lam thawk turin State Police personnel 3553 bakah Central Armed Police Forces (CAPF) Company 12 an duty dawn a. Flying Squad Team (FST) 83 awmin Static Surveillance Team (SST) 81 an awm a, Check Post (Nakas) 52 siam niin heng zinga 12 hi Inter-State Boundary-ah an awm a, a bak zawng hi State chhung hmun hrang hrangah dah a ni. MCC puan a nih atanga April ni 15, 2024 thlenga zu leh ruihhlo man hlut zawng chu Rs. 47,984,035/- a tling tawh a. Silai 8 leh a mu thahnem tak bakah leh Geletin 110 leh Detonator 110 man a ni tawh bawk. CAPF company 5 (CRPF vek) chu inthlan zawhah Strong Room leh Counting Centre te veng turin an Mizoramah an cham tlang ang a, a bak company 7 (CRPF - 2, BSF - 2, ITBP - 3) chuan State dang Inthlanpuia duty turin poll day zawh hian Mizoram an chhuahsan thung ang.
Kumin inthlanpui atan hian Contesting Candidate 6 awmin BJP, INC, MNF, ZPM leh MPC ten candidate neiin Independent candidate 1 a awm a, an zingah hian hmeichhia 1 awmin MPC party candidate a ni. 1-Mizoram (ST) Parliamentary Constituency for General Election to Lok Sabha, 2024 atan hian Election Commission of India chuan General Observer 1, Police Observer 1 leh Expenditure Observer 2 a ruat a ni.
Kum 85 chunglam leh PwD voter te zingah in lama vote thlak duh tan Home Voting kalpui a ni a, mobile polling team ten an chenna inah kalchilhin vote thlak tir an ni. Mizoram pumah April ni 4 - 15, 2024 inkar khan Home Voting hi kalpui a ni a. Kum 85 chunglam mi 1792 leh PwD voters mi 317 ten vote an thlak a ni.
Vote thlak ni a vote tlak dante hi darkar 2 dan zelah Pollstar App kaltlanga report zung zung tura ruahman a ni a, inbiak pawh harsatna hmunah erawh MPRO kaltlanga chanchin inhrilhhriat tum niin, District tina Control Room-ah Pollstar Nodal Officer leh official dang bakah MPRO Team an duty vek dawn a ni.
Poll day-a a tul ang te buaipui a ngaihven turin CEO Office-ah hetiang hian mawhphurhna hrang hrang changtu tur siam niin, biak pawh theihna pawh hetiang hian ruahman a ni:
State Control Room : 0389-2954202/8787622508
Communication Control Room : 9612317499
Media Monitoring Control Room : 0389-2954392/8731806897
Webcasting Control Room : 9612153577
EVM Control Room : 9436383058
District tinah Call Centre din niin Mizoram Election Helpline Toll Free no. 18003351950-ah hian Election vuakvet laia complain duh emaw Election kaihhnawih harsatna neite tan a thlen theih reng a, chhunzan zawmin official ruat bik ten an vil ang. BSNL service awmlohna Khawzawl District-ah Phone no. 6909245177 leh Saitual District-ah Phone no. 8731817838 ruahman a ni.
Vote tlate hi June ni 4, 2024 (Thawhlehni) ah chhiar tur niin result pawh puan nghal a ni dawn a. Vote chiarna tur Counting Hall pawh peihfel vek tawh niin Mizoram pumah Counting Centre 13 ruahman a ni a. Aizawl District-ah Counting Centre 3 a awm ang a, District dang zawngah Counting Centre 1 theuh a awm ang.
State Level MCMC hi vawi 4 an thukhawm tawh a, BJP, INC leh MNF atanga Print Media leh Electronic Media advertisement chhuah tur Pre-certification dilna lut zinga 4 te chhuah phalna pek a ni a. District tinah District Level MCMC din ni bawkin, anni kaltlang hian a tul dan azirin political advertisement pre-certify a ni bawk.
April ni 19, 2024 (Zirtawpni) zing dar 7 atanga tlai dar 5 thleng hian vote a thlak theih dawn a, he ni hi Sawrkar chuan Public Holiday-ah a puan mai bakah Sawrkar hnathawk lote tan pawh hlawh kiam chuang lova chawlhni ‘Paid Holiday’ atan a puang bawk a. Dry day-a puan a nih avangin zu zawrh, sem leh in phal a ni lova, mimal tumahin zu lakkhawl leh chheprelh phal a ni lo bawk. Representation of the People Act, 1951 Section 126 in a sawi angin vawiin tlai dar 5 atanga vote thlak ni tlai dar 5 thleng campaign lam hawi reng reng neih/kalpui phalloh hun, Silence Period a nih vangin mipuite Dan zawma insum hram hram turin kan inngen nawn leh a ni.
Election Department chuan inthlanna huapzo, muanawm, felfai, dik leh lang tlang, India ram pum tana entawn tlak siam puiah mipuite a sawm a. Vote nei tawh phawt chu khua leh tui nihna anga mawhphurhnate hlen chhuaka vote thlak theuh turin a chah a. Kum hmasa lam zawnga vote tlate khuma India rama vote tlak thatna ber State kan nih theih nan thahnemngai taka tanrual puiah mipuite a sawm nawn leh a ni.
