393/2024-2025

LUNGLEI; the 1st May, 2024: Vawiin chawhnu khan Lunglei District Election Officer leh Bawrhsap ni bawk Pi Ramdinliani, IAS kaihhruaina hnuaiah DC Conference Hall-ah Lok Sabha 2024 inthlanpui neih zawh tak Vote chhiar tura inpuahchah dan thlirhona meeting chu Nodal Officer te leh Police Official te nen neih a ni.

Pi Ramdinliani chuan Lunglei District in boruak muanawm tak hnuaia  felfai taka Lok Sabha inthlanpui vote chhiar  kan neih theih nan Lok Sabha inthlanpuia Nodal Officer ruat te hi nikum MLA inthlanpui a Nodal Officer-te deuh vek tho kha ruat an ni a. Nikum MLA inthlanpuia tha taka an mawhphurna an hlen tawh angin Lok Sabha inthlanpui vote chhiarah pawh Nodal Officer te chu thei tawp chhuah theuh turin a chah hlawm a ni.

Vawiin meeting-ah hian Pi T.T. Beikhaizi, Election Officer, chuan Lok Sabha inthlanpui neih zawh tak vote chhiar tur  inpuahchahna kalpui dan leh ruahmanna hrang hrang an siam te sawiin,  Lunglei District hnuaia Assembly Segment 6 a vote tla te chhiar nan  hian Saikuti Hall Ground Floor-ah Counting room 6 siam a ni a, vote hi round 4 a chhiar zawh tura ruahmanna siam a ni, a ti. Inpuahchahna hrang hrang, Counting Official ruat te, training buatsaih dan tur te, Randomization hun te a tarlang bawk.

Pu J. Lalmuankima, Superintendent of Police chuan boruak muanawm tak hnuaia Lok Sabha inthlanpui vote te felfai leh thianghlim tak a chhiar anih theih nan Police te inpuahchah dan, hmalak tawhna te leh hmachhawp hrang hrang te a sawi a, Law and Order kenkawh bakah Traffic movement a hmalakdan tur te a sawi bawk.

Vawiin meeting-ah hian Lok Sabha inthlanpui vote chhiar nana inpuachahna hrang hrang Media Centre siam te,  Internet Connection te, Official ID siam te, Refreshment chungchang te, Decoration te bakah hmanrua mamawh tur te sawiho a ni bawk.