505/2025-2026
May 20, 2025: Union Public Service Commission(UPSC), New Delhi chuan kumtin a a tihdan angin ni 25th May, 2025 (Sunday) hian India rama Centre hrang hrangah Flagship Examination of the Commission ti a an sawi thin Civil Services (Preliminary) Examination, 2025 chu a buatsaih leh dawn a. India ram hmun dangte ang bawkin 47-Aizawl Centre-ah pawh Sub-Centre 3 (Pathum)- Government Hrangbana College, Chanmari, Mizoram Public Service Commission Examination Hall, MINECO, Khatla ah leh Government Mizo High School, Mc Donald Hill-ah te buatsaih turin ruahmanna a kalpui mek a, Aizawl Centre-ah hian Candidate 1027 an awm a ni. Secretary, Mizoram Public Service Commission & Coordinating Supervisor for 47-Aizawl Centre chuan Candidate-te chu he Examination hi felfai leh tluang taka neih a nih theih nan heng a hnuai hriattur pawimawh tarlante hi uluk taka chhiar a, zawm ngei turin a ngen a ni :-
1. Tlai lo tura in hmakhua: Examination hi Shift hnih a neih tur a ni a, UPSC Guidelines angin Shift tinah Exam tan hma darkar khat leh a chanve ah Exam Centre Gate hawn a ni ang a, Exam tan hma darkar chanve ah Exam Centre Gate khar a ni ang. Exam tan hun hi Paper-I tan Chawhma lamah zing dar 9:30 a ni ang a, Paper-II Chawhnu lam hi dar 2:30 a ni ang. Hemi dungzui hian Exam Centre Gate-te hi zing dar 9 ah leh Chawhnu dar 2 ah khar an ni ang a, hemi hnu hian Candidate tumah luhtir an ni lo ang. Tin, Examination Hall luh hmain Police in Metal Detector hmangin Frisking an neih vek dawn avangin Candidate-te chu in hmakhuaa tlai lo turin thurawn pek an ni.
2. Examination Hall-a kenluh phal lohte dahna tur siam a ni dawn tawh lo: : Examination Hall-ah Pen, Pencil, e-admit card, Self photos, ID Proof emaw e-admit card a tarlan te chauh ken luh phal a ni dawn a, hemi bak hi chu thildang engmah ken luh tum lo turin Candidate-te chu thurawn pek an ni. UPSC in Exam Hall a ken luh a phalloh thil –Mobile Phones, Smart Watch, Bluetooth Device, Bags, etc., te Candidate ten an lo keng a nih pawhin an dahthatna tur Commission-in a hranpa in a ruahman tawh dawn lo a, an dahna tur leh a himna kawngah Commission leh a mi chhawr ten mawh a phur lo ang.
3. Help Desk, Canteen Facilities & Control Room: Civil Services (Preliminary) Examination, 2025 Sub-Centre 3 (Pathum)-ah te hian Candidate-te remchan zawkna turin Exam ni hian Help Desk buatsaih a ni ang a, Canteen-ah ei leh in lei tur a awm bawk ang. Tin, 22nd- 25th May chhung atan MPSC office-ah Co-ordinating Supervisor’s Control Room siam a ni a, Mobile Phone No. : 8132055148 & 9862304324-ah te biak pawh theih kan ni ang.
4. NGENNA : Co-ordinating Supervisor chuan Candidate zawng zawngte Exam felfai leh hlawhtling tak buatsaih a nih theih nan heng ngenna te hi zawm ngei turin a ngenin a beisei tak meuh a ni.
