362/2024-2025 

Champhai, the 25th April, 2024: Mizo Hmeichhe Insuihkhawm Pawl (MHIP), Champhai Sub-Hqrs. Silver Jubilee (1999-2024) lawmna leh Conference tum 17-na, April ni 25-26, 2024 chhung awh tur chu vawiin chawhma dar 10:30 khan Mangkhaia Hall, Champhai Zotlangah tan a ni. He hun hi District Bawrhsap Pu James Lalrinchhana chuan khuallian niin a hmanpui a, Pi B. Sangkhumi, Vice President, MHIP General Hqrs. chu khualzahawm a ni. District Bawrhsap hian chawhma dar 9:30 khan MHIP Office, Old DC Complex-ah Silver Jubilee pual lungphun a hawng bawk.

Khuallian Pu James Lalrinchhana chuan 'Mite Tanpui' tih thuipuia hmangtu MHIP te'n hmeichhia leh chanhaite dinpuia an aiawha an penchhuak thin chu ropui a tih thu sawiin, hemi kawnga an thawhhlawk em avang hian kum 2016 ah India rama hmeichhiate dawmkan kawnga hma la tha chawimawina sang ber Nari Shakti Puraskar hial a dawng a ni, a ti a. Champhai Sub-Hqrs. MHIP in Silver Jubilee hmel an hmu ta chu thinlung taka a lawmpui thu sawiin, thlen chinah lungawi mai lova hmabak enge ka neih tih ngaihtuah chunga hmasawn duhna rilru nena hmalam pan zel tum turin member tinte a chah a. Silver Jubilee lawmna leh Conference lawmna hun General Hqrs. hotute'n an uap thei chu lawmawm tiin, Champhai District an cham chhunga hun nuam tak hmang turin duhsakna a hlan a. MHIP chu Mizoram mai nilo, State pawn thlenga a inzarpharh thu sawiin, hei hian mizo hmeichhiate dinhmun leh hlutna a chawisan mai bakah zuamawma an awm tur a veng a ni, a ti a. District hmasawnna kawnga inzirtirna leh hmalakna pawimawh, a bik takin sawrkar khawih thilah MHIP te'n phur taka sawrkar an tawiawm thinnaah lawmthu sawiin, a sulsutute zinga an tang thin chu entawntlak a tih thu a sawi a, sawrkar hmalakna tawiawma thlawp zel turin a sawm nghal bawk.

Pu James Lalrinchhana chuan MHIP member-te chu chhungkaw inenkawlna kawnga dinhmun pawimawh tak chelh an nih thu sawiin, mawhphurhnate tha taka an hlen thin chu fakawm a ti a. Tha taka chhungkua enkawla, ram leh hnam siamthat kawnga theihtawp chhuah chhunzawm zel turin a chah a. Ram leh hnam hmelma lian tak ruihhlo do kawnga theihtawp chhuahpuiah member tinte sawmin, khawtlang run mektu ruihhlo do kawngah kan zavaia tanrual a ngai a, tha kan thlah thiang lo a ni, a ti a. Zirna kawngah theihtawp chhuah turin a fuih bawk a. Hruaitu ni mekte chu an thachhang dawl thei tur hruaitu thar, mi tha tha tak chherchhuah tum turin a chah a; hei hian nakin zela pawl chak leh entawntlak siam kawngah a pui thei dawn che u a ni, a ti a. Khawtlang, kohhran leh ram tana thahnemngai taka rawngbawltu MHIP chu an pawimawhzia hriaa theihtawp chhuaha hmasawn zel tum turin a chah a. Silver Jubilee lawmna chuan rilru puitlinna leh rualelna kawngah hmasawnna thlen se a duh thu sawiin, Champhai Sub Hqrs. MHIP kalzelna turah duhsakna a hlan a, Silver Jubilee lawmpui nan pawisafai Rs. 15,000/- a hlan nghal bawk.

Khualzahawm MHIP General Hqrs. Vice President Pi B. Sangkhumi chuan din a nih atanga MHIP hmalakna leh hmeichhiate dinhmun chawikan kawnga theihtawp chhuah a nih dante tarlangin, hmeichhia leh naupang dawmkan kawnga hmalaknaah Sawrkar laipui leh State sawrkarin MHIP te thawhpuiin sawrkar kutke pawimawh tak a ni mek a, sawrkar pawhin MHIP te a ngaipawimawh thiam hle a ni, a ti a. Hmeichhiate chanvo leh dikna vawnhim a nih theih nana MHIP hmalakna zarah Mizo Inneih, Inthen leh Roluah Dan siam a nih thu leh Local Council/VC ah hmeichhiate tan hmun thum a thena hmun khat seat reserve a nih thu sawiin, MHIP Day chu State Holiday-ah puan a ni a, Domestic Violence Act pawh hman a ni, a ti bawk.

Pi B. Sangkhumi chuan Champhai Sub-Hqrs. MHIP te'n Silver Jubilee an thleng chu a lawmpui takzet thu sawiin, member-te chu mahni inngainep mai lova, khawtlang siam that kawnga theihtawp chhuah tum turin a chah a. Insuihkhawm chu chakna a ni tih hre thar tur leh midang tana malsawmna ni tura theihna an neih, ban sei leh kut tam an nihna tangkai taka hmang thiam turin kalkhawmte a fuih a. Inhmangaihtawnna leh thawhhona tha vawngnung tlat tur leh midang tana malsawmna nih tum turin a chah bawk a. MHIP Gen. Hqrs hmingin lawmpuina Rs 10,000/- a hlan nghal bawk.

He hun hi Pi Lalhmachhuani Varte, President, MHIP Sub-Hqrs. Champhai chuan kaihruaiin Rev. K. Lalthlamuana'n hunserh a hmang a. Secretary Pi L.H. Lalrengpuii hnen atangin report ngaihthlak a ni a. Silver Jubilee Souvenir Editor Pi Lalhlimthangi Khiangte, Vice President, Sub-Hqrs. MHIP Champhaiin souvenir buatsaih dan a sawifiah hnuah khuallianin a tlangzarh a. Zai leh lam mawi tak tak thlir leh ngaihthlak tur a awm a. Hruaitu lo ni tawhte chawimawina hun hman niin OB hluite'n thu an sawi bawk.

He hunah hian MHIP Gen. Hqrs. atangin Pi Lalliani, Gen Secretary, Pi Chuaudingliani, Fin. Secretary leh member dangte, MUP District Hqrs. hruaitute, Sub-Hqrs. MZP hruaitute, Sub-Hqrs. MHIP Advisers, Patron leh hruaitu hluite bakah block hrang hrang hruaitute len member-te an tel a ni.

Sub-Hqrs. MHIP Champhai Silver Jubilee lawmna leh Conference puala hun hman hian naktuk thleng a awh dawn a. Vawiin chawhnuah hun hman chhunzawm niin Silver Jubilee ruai kilho a ni a, program hi zan lamah hman chhunzawm a ni ang. Ruahman dan chuan naktuk hian rorel inkhawm neih a nih dawn bakah kum 2024-2026 chhunga pawl hruaitu tur an thlang dawn a. Parlam intihsiakna neih a nih dawn bakah member boral sunna, kum 10 chhung a zawna OB tang tawhte chawimawina leh Tobacco Awareness-te neih a ni bawk ang.

MHIP Sub-Hqrs. Champhai hi Block atanga Sub-Hqrs. ah hlankai niin 14.01.1999 khan din a ni a. Block 3, Tuipuiral Block, Hnahlan Block leh Hringlangtlang Block-te awm mekin Joint 1, Hnahlan Joint a awm bawk a. Branch 68 neiin member 27,828 an awm mek a ni.