Nimin khan Saikuti Hall, Lunglei-ah Agricultural Technology Management Agency bultumin ni 2 awh tur ‘Agriculture Exhibition’ neih a ni a. ATMA Exhibition hi Lunglei DC leh Chairman, Governing Board of ATMA, Lunglei District ni bawk Pu Ashish Madhaorao More-in a hawng a; Agriculture Department bakah AH&Vety, Horticulture, Soil&Water Conservation, Fisheries, Sericulture, KVK bakah Ruchi Soya Company ten an dehchhuah leh hmalakna hrang hrangte an pholang.

Khuallian Lunglei DC Pu Ashish More chuan nikum 2014 chhung khan sum hmuh loh avangin ATMA Exhibition neih theih a nih loh thu tarlangin kuminah Lunglei District huamchhunga khaw hrang hranga loneitu leh kuthnathawktuten an thil dehchhuah pholan theihna exhibition hlawhtling tak buatsaih a nih theih chu lawmawm a tih thu a sawi a. Mizoram sorkarin kuthnathawktute tana ruahmanna pawimawh tak NLUP a kalpui mek zarzova ahni eizawnna kawng thlana hlawhtlinna hmu ek engemawzat an awm zel a, chungte pawh chuan vawiina Exhibition-ah hian an hmalakna leh thawhrimna rahte mipui hmuha an rawn pholang thei chu a ropui tak zet a ni, a ti. Loneia eizawngtute leh a kaihnawih kuthnathawka eizawngtute chu pawimawhna leh ngaihsak an hlawh deuh deuh hi ram hmasawn zelna atan pawhin a tul tak zet a, hetiang Exhibition buatsaih hian anmahniah fuihna leh chona lian tak a siam thin a ni, a ti bawk.

Nimina hawn tak ATMA Exhibition hi naktuk ni 13.2.2015 (Zirtawpni) chawhnu dar 2:00-ah Director of Agriculture Dr.C.Lalzarliana'n a khar ang a. Exhibition chhung hian Agriculture Department, AH&Vety, Horticulture, Soil&Water Conservation, Fisheries, Sericulture, KVK leh Ruchi Soya Company hnuaia kuthnathawktute thil dehchhuah hrang hrangte chu mipui chhimtuten man tlawm zawkin an lei thei dawn a ni.