MYC CHAIRMAN PU JOSEPH LALHIMPUIA’N ZOBAWK GROUP YMA CONFERENCE VAWI 19-NA A HMANPUI
Zobawk Group YMA chuan ‘Ram leh hnam humhalh’ tih thupui hmangin 20th – 21st April 2018 hian Venghlun Mualah Group Conference vawi 19-na an hmang a. Lunglei East Assembly Constituency bialtu MLA leh Mizoram Youth Commission (MYC) Chairman ni bawk Pu Joseph Lalhimpuia chuan khuallian niin a hmanpui.
MAGNETIC MIZORAM INVESTORS SUMMIT A TIAK TA; CHENG VBC 2,100 HU MoU ZIAH A NI
Ni hnih awh Magnetic Mizoram Investors Summit, Berawtlang Tourist Convention Centre-a buatsaih chu vawiin khan Mizoram pawn leh chhunglam atanga mi sawmten sawihona leh inkawmna an neih hnu in a tiak ta. He hunah hian Mizoram Chief Minister Pu Lal Thanhawla chuan Mizoram aiawhin Company pahnih nen thawhhona thuthlung a ziahpui. He MoU hi Pu Deepak Khera, MD, Hospitality Doctor leh Pu Premjit, Sungevity Enterprises Chairman te nen ziah niin, MoU ah hian Hospitality Doctor chuan Mizorama Investment tih nan Rs.1,500 crores an dah a, Sungevity Enterprise (Solar plant company) chuan Rs. 600 crore an dah bawk a ni.
MIZORAM GOVERNOR LEH CONSUL GENERAL TEN INKAWMNA AN NEI
Vawiin tlai khan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chuan Dr. Michael Feiner, Consul General of the Federal Republic of Germany chu a chenna Raj Bhavan-ah inkawmna a neihpui a ni.
CHIEF MINISTER-IN INSTITUTE OF BIORESOURCES AND SUSTAINABLE DEVELOPMENT A HAWNG
Chief Minister Pu Lal Thanhawla chuan vawiin khan Institute of Bioresources And Sustainable Development (IBSD) Mizoram chu Nursery Vengah a hawng. IBSD hi sawrkar laipuia Department of Technology, Ministry of Science and Technology hnuaia National Institute niin, a hmunpui ber chu Manipur a ni a. IBSD hian India hmarchhak state-te chu bioresources (nun khawchhuah nana thing leh mau leh nungcha atanga mihringin a hman tangkai) hmangin khawtlang nun leh ei leh bar tihhmasawn chu a thil tum niin, tunah hian Manipur-ah Centre pahnih a awm tawh a, Sikkim leh Meghalaya-ah Centre a awm tawh bawkin, Mizoram hi IBSD awmna state palina a ni.
CHAMPHAIAH UJJWALA DIWAS PRADHAN MANTRI LPG PANCHAYAT NEIH A NI
Vawiin khan Champhai Kahrawt YMA Hall-ah Mizofed Champhai buatsaihin Ujjawala Diwas Pradan Mantri LPG Panchayat, mirethei zawk AAY leh BPL chhungkua ST/SC miten Gas Connection a thlawna an neih theih dan tur inhrilhhriatna neih a ni a. He hun hi Champhai Addl DC Pu Liansangzuala Chhakchhuak chuan khuallian niin a hmanpui.
CHAMPHAIAH MULTI STATE MEGA MOCK DRILL NEIH DAN TUR REL
National Disaster Management Authority (NDMA) ruahmannain tun thla April Ni 26 hian a ruala lirnghing avanga chhiatrupna thlen palh thuta chet lak dan tur Multi State Mock Exercise on Eartquake chu Mizoram, Manipur, Tripura leh Nagaland-ah te neih a ni dawn a. Hemi atana inpuahchahna leh sawihona DC Conference Hall, Keifangtlangah, Pu Liansangzuala Chhakchhuak Addl DC hovin neih a ni.
AIZAWL TRAFFIC S.P THUCHHUAH
SIPMIU (NERCCDIP), Aizawl te chuan Saron Veng, Main Road (Bazar Bungkawn - Armed veng Thlanmual) ah ni 22.4.2018 (Pathianni) zing dar 10:00 atanga tlai dar 5:00 thleng kawng siamthat hna an thawh dawn avangin Aizawl Traffic S.P chuan hemi hun chhung hian lirthei eng chi mah hemi kawngpuiah tlan phal a ni lo tih thuchhuah a siam.
MIZORAM KAILAWN 2018 OUTREACH PROGRAMME MAMITAH MAY NI 2-AH HMANG DAWN
Vawiin khan DC Conference Hall Mamitah Pu Jacob Lalawmpuia, Addl.DC hovin Mizoram Kailawn 2018 Outreach leh Awareness Programme May Ni 2 a neih tur chungchangah Programme felfai taka ruahman a nih theih nan Meeting neih a ni.
HUAISEN LAWMMAN TIH SAN A NI
Sawrkar laipui chuan thuchhuah siamin Huaisen lawmman hrang hrang, Jeevan Raksha Padak te chu January ni 25, 2018 atangin hetiang hian tih san a ni; Sarvottam Jeevan Raksha Padak dawng te hnenah cheng nuai Khat, Uttam Jeevan Raksha Padak dawngte te hnenah cheng Singruk leh Jeevan Rksha Padak dawngte hnenah cheng singli pek an ni tawh ang.
CHAKMA AUTONOMOUS DISTRICT COUNCIL INTHLAN TLUANG TAKIN NEIH A NI
Chakma Autonomous District Council (CADC) inthlanpui chu ruahman lawk angin tukin dar 7 atang khan mipuite'n tluang takin vote an thlak tan a; khawi hmun atang mahin thil duhawm lo lian tham thleng hriat tur a awm lo va. Chawngte Police Station-a inthlan kaihhnawiha thil felhlel awm nia hriat report lutte pawh chinfel nghal a nih thu Police thuneitute chuan an sawi.