2839/2026-2027

Dated Serchhip, the 27^th October, 2026: Vawiin khan 5^th Mizoram State Level EMRS Sports Meet, 2026 chu Eklavya Model Residential School (EMRS), Serchhip ah hawn a ni.

He hun hmanpuitu khuallian Additional Deputy Commissioner Serchhip Pi Dorothy Muansangi chuan thu sawiin, zirna leh infiamna chu a kal kawp tlat a, zirlaite taksa leh rilru hriselna atan infiamna a pawimawh thu a sawi a. EMRS zirlai kalkhawmte chu theihtawp chhuah a, infiammi rilru pu chunga tha taka intihsiakna hmachhawn turin a fuih a ni.

Hawnna inkhawm hi Pu Lalhmingmawia Sailo, Programme Manager, Mizoram EMRS Society, P&PI Department  chuan kaihruaiin, Welcome Speech a sawi a, Oath Taking neih chhunzawm nghal a ni.

He Sports Meet-ah hian Mizorama EMRS School 11 te an tel kim thei a. Kum dang zawngah chuan State Society in a thleng thin a, tun tum hi School-in a thlen vawi khatna a ni.

He intihsiakna-ah hian Football, Volleyball, Basketball, Athletics, Chess leh Table Tennis hmangin inelna neih a ni ang a, October ni 27-30, 2026 chhung neih tur a ni.

He hun hi EMRS Serchhip Principal, zirtute, zirlai leh sawm bikte'n an hmanpui a ni.