2849/2026-2027

Dated Aizawl, the 27th October, 2026: Vawiin khan School Education Minister Dr Vanlalthlana chuan MZP Rising day leh kum 90 tlin lawm kharna hun Berawtlang Multipurpose Hall-ah a hmanpui.

School Education Minister chuan he hunah hian thusawiin MZP hi sorkar lo khalh ngil tawhtu a ni a, remna kan neih theih nan te, zofate inpumkhat nan te, ramri humhalh nan te, hnamdangte chimrala kan awm loh nan te, Mizo faten technical seat kan hum theih nan te an thawhhlawk hle a, hma lam hunah pawh tha thawh zela theih tawp chhuah zel a ngai a ni a ti. Zirlaite hi Zoram hmabak an ni a, danglamna siamtu, thil thar hmuchhuaktu, ram hruaitu an la.awm dawn, tuna awm mekte hi nakin lawkah kan ral zel dawn a, he ram hi kan inhlanchhawng zel a ni. Kan mi hmasaten an hun laiin an lo humhim tawh a, kan hun țheuhah kan humhima, țhangtharte chenna tlaka kan siam zel a ngai. 

Dr C.Lalremruata President pawhin thu a sawi a. Sorkar hi a theih chin chinah MZP hian a thawhpui dawn a, a thlawp dawn. Chutih rualin an dik lohna leh fel lohnaah erawh chuan kan dodal zel dawn tih a sawi a. Zirlai pawl inthlanah political party te inrawlh lo se, a duh thu a sawi bawk. Zirlaiten pass ringawt ni lova, chhawr tham thiamna neih a țul thu leh fa hrin manhla nih a țul thu a sawi bawk. 

MZP hi kum 1935 khan din a ni a, kum 90 tlin lawmna nikum ațanga neih chu vawiin hian a hmawr bawk a ni. MZP hian Programme pawimawh tak tak a hmang țhin a, HSLC Top 10-a Mizo tling chawimawi te, Zofest, Zirlaite Ni, Zoram Ni, Inter High School Quiz Competition, Hnamdang nupui/pasal nei lo tura inzirtirna te leh Remna Ni te an hmang țhin a ni. 

MZP din cham  leh kum 90-na lawm kharna hun hi Pu Sanghmingthanga Vice President-in a kaihruai a, Pu C.Lalhmingsanga General Secretary-in report a pe a, Souvenir tlangzarh a ni bawk. He hunah hian MZP hruaitu țanglai leh hruaitu hlui te, zirlaite an tel a ni.