2841/2026-2027

Dated Aizawl, the 27 October 2026: Vawiin khan Pu Vanlaldina Fanai, Chief Registrar of Births & Deaths–cum- Commissioner & Secretary chuan Directorate of Economics & Statistics Conference Hall, MINECO-ah, Directorate of Economics & Statistics buatsaih Annual Report of Births & Deaths, 2025 leh Medical Certification of Causes of Deaths (MCCD), 2025 te chu khuallian niin a tlangzarh.

Tlangzarh inkhawmah hian khuallian Pu Vanlaldina Fanai, Chief Registrar of Births & Deaths cum Commissioner & Secretary chuan thusawiin, Annual Report of Births & Deaths 2025 leh MCCD Report 2025-te hlawhtling taka tlangzarh thei a ni leh ta chu lawmawm a tih thu a sawi a. Report an tlangzarh takte chu mipuite, a bik takin zirbing mite tan a tangkai hle dawn tih sawiin, Mizoram dinhmun dik tak tarlanna a nih anga mipui vantlang pawhin an tangkaipui hle tur thu a sawi a. A buatsaihtute thawhrimna chhuanawm a tih thu sawiin, chhun leh zan pawh sawi lo va rim taka report khawr pum tura tha thawhtute inpekna chu a chhuanawm hle tih a sawi a. A zau thei ang bera mipuite hnenah report hlutna te chu inzirtir leh hman tangkai kawngahte theihtawp chuahpui zui zel turin kalkhawmte chu a sawm nghal bawk a ni.

Tlangzarh inkhawm hi Dr. Lalrinchhana, Director, Directorate of Economics & Statistics chuan kaihruaiin, Pu RK. Lalrinawma, Assistant Director, CRS branch chuan report tlangzarh takte chungchang a sawizau a. Annual Report of Births & Deaths 2025 bu chu vawi 40 tih chhuahna a nih thu leh, kum 2025 a Mizoram chhung a nau piang leh mitthi register zawng zawng zat chuanna a ni tih a sawi a. Medical Certification of Causes of Deaths (MCCD) 2025 report chu vawi 21 an tihchhuahna a nih thu leh, hetah hian Mizoram chhunga Damdawi In bik a mitthi ziah luh zawng zawng zat bakah an thih chhante kimchang taka chhinchhiah a ni tih a sawi bawk.

2025 MCCD Report in a tar lan dan in Mizorama thih chhan langsar zual zingah, Thawk lama harsatna leh a kaihhnawih natna (Disease of the Respiratory system) 17.3 % leh Pumpui leh a kaihhnawih natna (Disease of the Digestive System) 15%-te chu a hluar  zual a ni.