2844/2026-2027

Lunglei, 2026 Khuangchawi Thla ni 27: Vawiin khan Lunglei District Leitlangpui Run Core Committee chu an Chairman, District Bawrhsap Pi Navneet Mann kaihhruaiin Lunglei DC Conference Hall-ah an ṭhu khawm a. November ni 6, 2026 (Zirtawpni)-a 1st Leitlangpui Run 2026 buatsaih tur atana inpuahchahna leh inbuatsaihna hrang hrang an thlir ho.

Chairman Pi Navneet Mann chuan Leitlangpui Run hlawhtling tak huaihawt a nih theih nana mawhphurhna hrang hrang neitu department leh pawl hrang hrangte inpekna leh thawh rimnaah lawm thu sawiin, theih tawp chhuaha an mawhphurhna hlen chhuah tum zel turin a chah a. Intlansiaka tel tura inziak lutte chungah lawm thu sawiin, intlansiak tihlawhtling tura inbuatsaih sauh sauh turin a chah bawk.

1st Leitlangpui Run 2026 buatsaih tur atana mawhphurtu hrang hrang aṭangin an hma lakna report ngaihthlak a ni a. Intlansiak atana ruahmanna leh hmachhawp hrang hrang te, tih tur hmabak leh rawtna thar te, intlansiak hlawhtlinna atana thil ṭul leh pawimawh hrang hrangte sawi ho niin, hun hman dan tur chipchiar leh ruahmanna kimchang duan a ni bawk.

1st Leitlangpui Run 2026 hi November ni 6, 2026 (Zirtawpni) zingkarah buatsaih a ni dawn a. Intlansiak hi huang (category) thum – 10KM, 5KM leh 3KM-a buatsaih tum niin, tel turin mi 1,300 chuang an inziak lut a. A tel zawng zawngte tan t-shirt, Bib number, medal, e-certificate leh ei leh in tur ruahman niin, 10K leh 5K-a ti ṭhate leh kum zat anga ṭhena a ti ṭhate tan lawmman ṭha tak ruahman a ni bawk.