Vawiin hian Lawngtlai AH & Vety Office Farmers' Training Hall ah Minister of State for AH & Vety Pu C. Ngunlianchunga chuan NLUP 2nd Phase hnuaia Ar vulh thlangtu chhungkaw 154 te hnenah Final Instalment a sem.

Pu C. Ngunlianchunga chuan, sawrkarin Ar note, Ar in sakna, Archaw leina, Ar damdawi thlengin a pe che u a, a dawngtute hian engtinnge in thawh chhunzawm ve dawn tiin kan thlir zui dawn che u a ni, a ti a. Hetiang khawpa tanpuina felfai hi kan umzui peih lova, kan thawk zawm peih lo a nih chuan hmakhaw eng tak kan tan a vang hle dawn a ni, tiin a dawng tura kalkhawmte a fuih a ni.

Vawiina Ar vulh thlangtu Lawngtlai leh a chhehvel khua atanga kalkhawmte hi mi 154 niin mi 149 ten Rs. 54400 theuhvin an dawng a, mi pakhatin Rs 63350 dawngin a dang mi 4 ten 44400 an dawng thung a. A hma lama an dawn dan zir zela heng sumte hi pek niin Calendar of Works anga an sum hman dan tur ruahmanna pawh a in anglo hlek hlek hlawm  a ni.

Lawngtlai District chhunga 2nd Phase NLUP atanga Ar vulh thlangtute hi chhungkaw 350 niin vawiinah vek hian Sangau leh Bualpui bialah pawh Final Instalment hi sem a ni a, karleh lam atangin Bungtlang South leh Chawngte bial lamahte sem chhunzawm ani bawk ang.

Vawiina Minister in NLUP a semna inkhawm hi Lawngtlai DVO Dr. Lalnunhlima Ralte in a kaihruai a, Dr Malsawmtluangi'n lawmthu sawina hun a hmang thung a ni.