Vawiin chawhma dar 11:30Am khan D.C’s Conference Room-ah District Transport Office buatsaihin Siaha District chhunga Maxi Cab Service Khualzinte tan a him tawk leh him tawk lo chungchang DTO Office in Suvey a lo neih tawh chu Maxi Cab Owners’ & Drivers Association te nen zirhona an nei.

He hun hi Pu M.H. James, District Transport Officer chuan a kaihruaia, thu sawiin Pu James chuan Lirthei chetsualna tam zawk hi Khawl lam chian lohna ai mahin Driverte fimkhur tawk lo vang leh Rui lutuk vanga thleng a ni zawk tiin, kan ko-a Nunna hlu tak a awm a ni tih hriat a, tun aia fimkhur lehzual turin Lirthei khalhtute chu a chah hlawm a ni. MCODA lam atang pawhin harsatna an tawh hrang hrangte sawiin, Road Tax Update tura Signal awm loh thin avanga an tlai thin thute an sawi lang bawk a ni.

District Transport Office, Siaha hmalakna in Maxicab Service mipui tana a him tawk leh him tawk loh chungchangah Survey hetiang hian an lo nei a ni. Maxicab Service te hi Mipuite tan a him tawk em tih chu 77.2% in him tawka an ngaih laiin 22.8% in him tawklo ah an ngai bawk. Hun vawn dik lama chuan a tam zawkin hun an vawndiklo thu sawiin, Driver leh Counter nghaktute chu an hawihhawm tawk thu te, Lirthei khallhtu chu zuk leh hmuam, Zu lakah a fihlim em tih chu atam zawkin an fihlim tawklo tiin, Speed chungchang te, Overloading chungchang te, Thianghlimna lam te leh Lirthei chuan man (Fare) chungchangte, Enforcement chungchang lam te bakah Driver ten kawng lakah Zu lak an ching em tihte hmangin Survey Passenger 137 hnen atanga lak a ni.

Vawiin programme-ah hian Siaha khawpui chhung leh khaw hrang hrang atanga MCODA member te an tel kim hle a ni.