Vawiin chawhnu khan Transport Minister Pu John Rotluangliana chuan Mizorama a vawikhatna tur atana ruahman Two Wheeler Taxi chu Transport Directorate tual atangin a vailiam.

Hemi puala programme tawi buatsaihah thu sawiin Pu John Rotluangliana chuan Transport Department chu hlawkna tur ni lovin mipuite tana awlsamna leh malsawmna ni tura din a ni, a ti a. Two Wheeler Taxi neitu te pawhin mahni tana hlawkna um ringawt lovin an awm chhan tak mipuite hmakhua ngaia thawk thin turin leh sawrkarin rate bituk a siam te chu zawm turin a chah a. India ramah Two Wheeler Taxi chu Goa leh Mizoramah te chauh a  awm thu sawiin kan ramah thil thar nimahse nakin lawka ram hmel lanna tur a ni, a ti a.  Two Wheeler Taxi khalha eizawnna chu rinawmna, hawihhawmna leh taihmakna nen  eizawnna ngelnghet leh mipuite tana malsawmna a siam theih a ni, a ti a.  Permit pek kawngah tumah duhsak bik an awm loh thu sawiin permit thar pawh pek zel tura ruahman a ni, a ti a. Minister chuan kan ramah hnathawk peihlo kan tam ta lutuk chu veiawm a tih thu sawiin abik takin hemi  kawngah hian mipate kan inenfiah leh zual a ngai a ni, a ti a. Aizawl Two Wheeler Taxi Association (ATTA) member kalkhawmte chu an kalzelna turah duhsakna a hlan nghal bawk a ni.

Two Wheeler Taxi vai liamna puala inkhawm tawi buatsaih hi Pu R.Remmawia, Director, Transport Department-in a kaihruai a. He hunah hian Transport Secretary Pu Lalthangpuia Sailo bakah Transport Department leh Traffic Police lama hotute an tel a. Vawiin chawhma lam khan Traffic Police buatsaihin Two Wheeler Taxi khalhtute pual hian Awareness Campaign neih a lo ni tawh a ni.

Transport Departmet hian Two Wheeler Taxi Permit hi  September 2016 atang khan pe tanin tun thlengin permit 200 pek chhuah  tawh a ni a. Sawrkar rate bituk dan chu hetiang hi a ni:  Tlan chhuah tanna atanga Kilometre 1 chu  Rs 10. Chumi hnu atang chuan Kilometre tinah Rs 5 zel a ni tawh dawn a ni.( Entirnan: 1 Km - Rs 10, 2 Km – Rs 15, 3 Km - Rs 20).

Aizawl  Two Wheeler Taxi Association (ATTA) hi February Ni 5, 2017 khan din a ni a. Tun dinhmunah member 61 anawm mek a. Dinna bi tura siam (Stand) hi sawrkarin 19 a siam sak a, heng zinga stand 10 ah hian an ding mek a ni.