Nimin khan Eleven Sports National Ranking Table Tennis Championship 2016 (East Zone) chu R.Dengthuama Multipurpose Hall, Mualpui ah tluang taka zawh a ni a. He ranking tournament lian, Table Tennis Federation of India (TTFI) in a buatsaih, Mizoram Table Tennis Association (MTTA) in a huaihawt, kharna hun hi Pu Hmingdailova Khiangte, Parliamentary Secretary, Sports, UD&PA, etc., chuan a hmanpui.

Pu Hmingdailova Khiangte, Parliamentary Secretary, Sports, UD&PA, etc., chuan India ram pum huap tournament liantham MTTA in a hneh taka a thleng thei chu ropui a ti thu sawiin Mizo thalai tan remchanna nasa tak an siam sak nia a hriat thu leh Mizoram-a Sports Association dang te ti phurtu a nih a beisei thu a sawi. Sports vision neitha Chief Minister leh a thawhpui, Sports Minister viak tha tak, Mizoram in a neih avanga inkhelhna huanga Mizo thalaite mamawh khelmual leh inkhelhna hmunhma tam tak lo awm mek zel chu Mizo thalai ten hlutna chang hria se a duh thu a sawi a. Mizo thalaite tan chuan Sawrkar duhsakna chu hlawhtling tura chona aw anga dawnsawn tur a ni ang a ti.

Pu Hmingdailova Khiangte, Parliamentary Secretary TTFI hotute hnenah Mizoram-a tournament lian an rawn nghah avanga lawmthu sawiin Mizoram ah tournament tam zawk rawn buatsaih tur leh national sports body dang te pawh sawihmuhtu ni turin sawmna a siam a. Mizoram chu India ram pumpui huap inkhelhna thleng turin a inpeih a ni a ti.

11ven Sports National Ranking Table Tennis Championship 2016(East Zone) hi November 14 khan tan niin nimin khan zawh a ni a. He tournament ah hian Mizo TT Player zinga final lut awmchhun H.Jeho chuan Sub-Junior Boys ah hnehna a chang zo lova; sub-Junior boys ah tho hian Mizo rawlthar Alberto LR Ruata pawh in semi-final khelin hnehna a chang zo ta lo a ni.