Vawiin khan A.R.Ground-ah Mizoram chhunga Higher Secondary School hrang hrang te inelna 12th Mizoram Higher Secondary School Games ni thum (10 -13 December, 2013) awh chu khar a ni.

He School Games kharna hunah hian Pu P.Lalchhuanga, I.A.S, Director School Education Dept. chu khuallian niin, he school games hi a khar a ni. Pu P.Lalchhuanga chuan he 12th Mizoram Higher Secondary School Games hlawtlin theihna tur a hmalatu, mawhphurtu leh school leh zirlai naupang lo tel zawng zawng chungah lawmthu a sawi a. Zirlaite chu ram nghahfak an ni tih inhrereng chunga taihmakna vawng tur leh ruihtheih thil laka fihlim tur a chahin, zirna lamah pawh medal la pha ngei tura tang turin a chah a. Zirtirtute pawh ram nghahfak an enkawl a ni tih inhrereng chunga an mawhphurhna hlenchhuak zel turin a chah bawk.

Tun tum 12th Mizoram Higher Secondary School Games-ah hian Mizoram hmun hrang hranga Higher Secondary School 27, Aizawl pawn atang school 12 leh Aizawl khawchhunga school 15 te an tel a. Zirlai infiammi 1363 ten athletics, badminton, basketball, football, hockey, table tennis, volleyball leh judo-ah te inelna an nei a ni.

He 12th Mizoram Higher Secondary School Games-ah hian a pumpuiah Govt. Mizo Higher Secondary School, Aizawl an champion a. Best athletes hmeichhiaah Julie Malsawmtluangi, Govt. J.L. HSS chu thlan niin, Gold 4, Silver 2 leh Bronze 1 a la a. Best athletes mipaah C.Lalmuanpuia, Baptist HSS, Serkawn chu thlan niin, Gold 4 a la a ni.