2761/2023-2024
8th November, 2023: General Election to the Mizoram Legislative Assembly, 2023 atan nimin November ni 7, 2023 (Thawhlehni) khan Mizoram chhunga Polling Station 1276 ahte vote thlak niin, Poll Day atana ruat November ni 7, 2023 ah hian Mizoram hmun hrang hrangah vote thlak zawhfel hman a ni a. Vote thlak zawh hun hi zan dar 11:50 niin, engkim felfai veka ngaih niin vote thlak that Repoll ngai lo tura ruat a ni.
Vote thlak zawh tuka neih thin inthlan buaipuitu Polling Official-te Document pawimawh hrang hrangte endikna, Post Poll Scrutiny chu vawiin November ni 8, 2023 (Nilaini) khan District hrang hrangah General Observer, RO leh ARO ten an nei a, he hunah hian Political party/Candidate aiawhte pawh an tel a ni.
Uluk taka Post Poll Scrutiny hi neih a nih mek laiin, 20-Aizawl South -III (ST) Assembly Constituency huamchhunga awm 13-Muallungthu Polling Station-ah vote thlak hmaa neih hmasak phawt thin, EVM hmanga vote thlak chhinna ‘Mock Poll’ neihnaa vote tlate dan anga paih (clear) fel hmasa phawt lova mipui vote thlak kalpui tlang a ni tih hriat a ni a. Hemi chungchangah hian inrawnkhawmna neih a nih hnuah bialtu Returning Officer (RO) chuan Observer nen inrawnin inthlan that neih rawtna ECI ah a thlen a. ECI chuan sub-Section (2) of Section 58 of the Representation of the People Act, 1951 tlawhchhanin nimina 13-Muallungthu PS a vote thlak chu a rawn cancel a. ECI inkaihhruaina duan Chapter 13 of Hand Book for Returning Officer, 2023 sawi angin RO atanga rawtna lut chu ngun taka a ngaihtuah hnuah vote thlak that (Repoll) neih a rawn rem ti a; a hun atan November ni 10, 2023 (Zirtawpni) zing dar 7 atanga tlai dar 4 chu a rawn ruatfel nghal a ni.
ECI thupek angin 20-Aizawl South -III (ST) AC huamchhung 13-Mulluangthu Polling Station-ah vote thlak that a nih dawn avangin Election Department chuan hemi huamchhunga cheng mipuite, Candidate leh Political party-te chu Repoll nei tura lo inruahman turin a chah a. Inthlanna muanawm, felfai, dik leh langtlang neih a nih theih nana thawhpuiah a sawm nghal a, chutih rual chuan Silent Period a nih nghal avangin Campaign theih a nih tawh loh thu Election Department thuchhuah chuan a tarlang bawk.
