Ruahman lawk anga Lai Autonomous District Council hnuaia 13th General Election to Village Councils chu ni 25.3.2014 zing dar 7:00 AM atanga tlai dar 4:00 PM chhunga buatsaih turin State Election Commission, District Election Officer leh mawhphurtu hrang hrangte chu an inpeih ta. Village Councils 93 awma 85-ah inthlanna hi buatsaih a ni dawn a, Village Councils 8-a candidate-te seat awm zat chiah chiah zel an nih avangin candidate 34-te chu chuhtu awm loh avanga tlinga puan an lo ni tawh a ni. Hetih lai hian Lunghauka Village Council inthlanna atana Presiding Officer atana ruat Pu Porborai Headmaster, Lunghauka Primary School chuan Commission hriatpuina lova Returning Officer hna a lo thawh avang leh inthlanna dan zawm lova Independent candidate 5-te nomination enfiah laia a hnawl avangin nmin ni 23.3.2014 khan Commission thupek angin LADC thuneitute chuan a hna atangin an suspend nghal a. Hemi avang hian Lunghauka Village Council seat 4 awm hnawhkhat tur a nomination file a lo hnawl tawhte chu ennawn that leh a midang ruala ni 25.3.2014-a inthlanna nei turin Commission chuan thupek a chhuah bawk a ni, Hemi bakah hian Sawrkar hna atanga suspend tak Pu Porborai an chuhtu awm lova tlinga a lo puan tawhte chu pawm a ni ta lo bawk a ni.
He inthlanpuiah hian hmeichhia tan seat hauh sak chuh turin mi 205 in hming an pe a, heng zinga 8-te chu chuhtu an awm loh avangin tlinga puan an ni a, heti hian hmeichhia seat hauhsak bik 85 luah khat turin hmeichhe candidate 197 an awm a ni. A pumpuia inthlanna hmachhawn tur candidate awm zat chu 1059 a lo ni ta a ni. He Village Council inthlanpui neihna tur khaw 85 ah hian voters 43,823 an awm a, heng zinga mi 21,454 hi mipa an ni a, 22,369 hi hmeichhia an ni a, a pumpuia seat 445 awmah seat 411 atan inthlanna hi buatsaih a ni dawn a ni.
Inthlanna atana inbuatsaihna kawng hrang hrang pawn tluang taka kalpui a ni a, inthlanna atana hmanraw hrang hrang (polling materials) sem kual a, inthlanna kalpui dan vil tur a ruat Observer 3 leh Sector Officer 11 te pawhin an duty na hmun tur an thleng vek tawh a. Chutih rualin inthlanni a vote chhiar nghal lova ni 12.4.2014 a chhiar tur a nih avangin Ballot Box zawng zawngte hi Lawngtlai a Storage Centre- BNRGSK Hall-ah phurhkhawm vek a ni ang a, Ballot Box-te phurkhawmtu tur motor-te leh a venghim tu tur Police-te pawhin nimin 23.3.2014 khan Lawngtlai an chhuahsan vek tawh bawk a ni. Heng bakah hian tele-communcation network-in a thlen phak lohna Polling Station 27-a duty tur MPRO mi leh sate pawhin Lawngtlai an chhuahsan vek tawh bawk a ni.
He inthlanna tana Model Code of Conduct kenkawh chungchangah nimin thlengin Commission chuan complaint engmah a la dawng lova, dan leh thupek kenkawh kawngah pawh harsatna engmah report dawn a ni lo bawk.
Vawiin (24.3.2014) dar 12:00 Noon atanga dar 2:00 PM chhung hian inthlanna atana inbuatsaihna kalpui dan hriatna atan leh inthlanni atana inbiakpawhna (communication system) a that tawk leh tawk loh enchhinna atan ‘Communication Trial Run’ neih a ni dawn a. Inthianni bakah he Communication Trial Run neih chhung hian power supply leh communication system tha taka kalpui turin Commission chuan thuneitute a beisei a ni. Hetih rual hian District Control Room, Observer, Sector Officer, MPRO leh Returning Officer-te chu State Election Commission Control Room atangin biak pawh vek tum an ni dawn a, an mobile phone/telephone leh wireless set te chu switch off hauh lo turin a hriattir bawk a ni.
He Inthlanna atana campaign theih hun chhung chu vawiin tlai dar 4:00 PM hian a tawp dawn a, hemi hnu hian Village Council pawnlam atanga campaigner-te chuan an campaign-na hmun an chhuahsan vek a ngai ang a, vantlang inkhawm, kawngzawh leh campaign-na lam hawi vantlang hip khawm thei tur intihhlimna leh SMS hmanga campaign-te khap vek a ni tawh dawn a ni.
Democracy in a tum ber khua leh tui kan nih ang a kan aiawha roreltu tur duhthlan theihna chanvo kan neih hi a hlutzia hria a, Lawngtlai District-a Electoral Rolls a chuang khua leh tui zawng zawngte chu vote thlak vek turin State Election Commission chuan a sawm tak meuh a ni.
