428/2022-2023
Aizawl, 7th May, 2022 : Ni 3 awh Ministry of Health & Family Welfare, New Delhi leh Gujarat sorkar țangkawpin an buatsaih “14th Conference of Central Council of Health and Family Welfare (CCHFW),” “Swasthya Chintan Shivir” ti a sawi bawk, Tent City, Kevadia, Gujarat-a neih mek chu vawiin khan a hmawr bawk a ni a, Health Minister Dr R. Lalthangliana pawh he hunah hian telin thu sawina hun tha tak a nei a ni.
Mizoram sawrkarin hriselna kawngah hma a lak dan chungchang sawiin Sub-Centre Health & Wellness Centre tha taka kalpui a nih thute, ASHA/Health Worker te hnathawh dan, damlote kalchilh a, nau chhar thlenga an thawh dante a sawi a, thingtlang kilkhawr ber ber thlenga an fan chhuah thin thu leh damdawi in awm lohna hmunah an tangkai zia a sawi a ni.
Dr Thangtea chuan sawrkar laipuiin tehfung hrang hrang hmanga a endikna (national level survey) hian Mizoram sawrkar hmalakna that zia a tarlang tih sawiin, NITI Aayog in kum 2017 atanga endikna a kalpui khaikhawmna "Healthy States, Progressive India" ah Mizoram chu State te ho (smaller states category) zingah pakhatna a ni, a ti a. Infant Mortality Rate (naupiang 1000 zela thi zat) ah phei chuan kan chhuanawm hle a, kum 2009 a IMR 36 ni kha kum 10 hnu, 2019 ah chuan 3 ah a tla tawh a ni, a ti.
State danga awm ve lo Health Clinic Mizoram sawrkarin a ruahman thu pawh sawiin, tun dinhmunah Health Clinic 200 vel kan nei a, neih belh zel turin hma kan la mek a ni, a ti a. Health Clinic chu Health sub-centre ang deuh a kalpui a nih thu leh, health worker pakhatin a enkawl thute, khua/veng pakhat chin am huam tir thin thute, khawtlang hotute nen inrawn tlanga hmalak a nih thin thute a sawi a ni. .
Dr Thangtea chuan COVID-19 hripui leng avanga kan harsatna tawh atanga kan inzir a ngai a ni tih a sawi a, Mizoramin COVID-19 hripui dona kawngah kan ti tha ni a min sawi chhan chu mi zawng zawng kan tan rual vang a ni, a ti a. Sawrkar department hrang hrang bakah Tlawmngai pawlte, Sakhaw hrang hrangte bakah private daktawrte leh damdawi in te nen kan tang tlang a, mipuiin min thlawp tlat avangin kan che tha a, hetiang hi hmun dangah a awm ve loh avangin sawrkar lian leh ram ropui tak takte pawhin an tawrh nasat phah a ni, a ti.
Health Infrastructure tih that a pawimawh thu sawiin Dr Thangtea chuan Mizoram mai bakah India ram hmun hrang hranga harsatna kan tawh chu thawktu daktawr, nurse leh health worker te indaihlohna nasa lutuk hi a ni a, chu bakah thingtlang kilkhawr leh hmun hla zawka cheng ten damdawi a hun taka an hmuh zung zung theihna turin ruahmanna kan siam a ngai a, hripui leng kan hmachhawn leh hun atan hetianga kan inpuahchah hi a pawimawh a, thawktu leh hmanraw indaihlohna hi kan ngaih pawimawh hmasak ber a ngai a ni, a ti.
Hei bakah hian Dr Thangtea chuan hripui leng hi khuarel chhiatna chi dang nen a in ang lova, Central level ah leh State level a Ministry/Department hrang hrangte thawhho dan tur mumal taka ruahmanna siam lawk a tul a, sawrkar laipuiin hei hi ngai pawimawhin a rang lamin hma la se a duh thu a sawi bawk a ni.
Central Council of Health and Family Welfare (CCHFW) hi India Constitution Article 263 tlawhchhana din niin, India ram chhunga Hriselna (Health) kawnga sawrkar hmalakna chungchanga inrawnkhawmna sang ber a ni.
He inrawnkhawmna sang, Ministry of Health & Family Welfare a mi pawimawh te bakah state tina Health Minister te, Health Secretary te, leh Mission Director, National Health Mission te telna hi May ni 5, 2022 khan țan niin vawiin tlai khan khar a ni.
He meeting ah hian Health lampanga policy khawih pawimawh tak tak rel tura chhawp a ni a. An thupui pawh "Towards a Future-ready Healthcare Ecosystem" tih niin state tina Health Minister leh officials te an tel țha hle a ni.
Mizoram ațangin Health Minister Dr R. Lalthangliana bakah hian Health Secretary Pu R. Lalramnghaka leh Dr Eric Zomawia, Mission Director, National Health Mission te an tel a ni.
Attachment
- Loading attachment...
