4489/2024-2025

Kolasib, 28th February, 2025 : Vawiin khan Krishi Vigyan Kendra (KVK), Kolasib District chuan Scientific Advisory Committee(SAC) vawi 15-na an hmanga. He hun hi SAC Chairman Pu R. Lalnunzira, Additional Director, Department of Agriculture & Farmers Welfare chuan a kaihruai.

Pu R. Lalnunzira chuan he huna kalkhawmte lawmna thu sawiin,KVK dinchhan leh pawimawhna te a tarlang a. KVK chu loneitute pui tura zirna hmunpui a nih angin hemi kawnga chak zawka hnathawh a nih theih nan Scientific Advisory Committee neih a ni thin chu a hlawkthlakin lawmawm a tih thu a sawi.

Pu Lalringliana, Joint Director, Department of Agriculture & Farmers Welfare pawhin he hun ah hian thusawina hun hmangin, KVK in hmalakna a neihte chu Sawrkarin loneih kawnga Line Department a neite tan a pawimawh zia a tarlang a. Scienctific Advisory Committee an neih chuan thlaithar leh mipui hriselna kawngah rahbi thar a chhuah zel a beisei thu a sawi.

Vawiina Scientific Advisory Committee Kolasiba hmanna ah hian Dr. Michelle C. Lallawmkimi, Senior Sciecntist & Head, KVK Kolasib chuan Kum 2024 chhunga KVK Kolasib hmalakna langsar zualte Powerpoint Presentation hmangin Report pekna hun a hmang a. Hemi zawhah hian Subject Matter Specialist hrang hrangte chuan Kum 2025-2026 chhunga an hmalakna tur hrang hrangte Powerpoint Presentation hmangin an chhawp chhuak bawk a ni. Reports ngaihthlak zawhah hian SAC Members kalkhawmte chuan thutkhawmna nei nghal in KVK Kolasibin hmachhawp a neih mekte chu sawiho in an pawmpui nghal a ni.

He hunah vek hian Repair and Renovation hnuaia KVK Kolasib Administrative Building thuamthat chu Pu R. Lalnunzira, Additional Director, Department of Agriculture & Farmers Welfare chuan a hawng nghal bawk a ni.

Krishi Vigyan Kendra (KVK), Kolasib District in Scientific  Advisory Committee (SAC) vawi 15-na vawiin a hmanna ah hian SAC Member-te, ICAR, DAO, DHO, DVO, DFDO, DLRS & WC, Lead Bank Manager, NABARD, NGO hruaitute, AMFU, kuthnathawktu hlawhtling thenkhat sawm bikte leh Chanchinthar lakhawmtute an tel thei a ni.