Lunglei District Cooperative Union (LDCU) Ltd. chuan vawiin khan YMA Sub Hqrs. Conference Hall, Venglai, Lunglei-ah an General Assembly vawi 19-na an hmang a, Lunglei HPC Vice-Chairman Pu S.Laldingliana chu Khuallian chan changin inkhawmpui hi a hmanpui a ni.

LDCU General Assembly hawnna inkhawm LDCU President Pu H.Lalnunmawia kaihhruaiah Khuallian Pu S.Laldingliana chuan ramchhung state hrang hrangah mipuiten Cooperative hi an chhawr tangkai hle a, ram sum leh pai dinhmun pawh nasa takin a pui a ni, a ti. Mizoramah pawh Cooperative thenkhat APEX, MULO leh MIFCO angte hi mipuiin an chhawr tangkai chho zel a, state pawhin hma kan sawnpui a ni, a ti bawk. LDCU hnuaia hnathawktute zawng zawng thahnemngaihna fakin Pu S.Laldingliana chuan tun aia nasa lehzuala Cooperative tangkaina chungchang mipuite hrilhhriat a tul thu a sawi a. LDCU-in ram an neih theih phawt chuan Lunglei HPC sum atangin an office building tur sak a ni ang, a ti.

He inkhawmah hian ARCS Pi Lilypari Sailo pawhin thu sawiin Cooperative din chhan leh thiltumte hi thawktute inpekna leh taimakna avangin tihhlawhtlin chho mek a ni, a ti a. Society din tawhte chauh ni lo, in-register thar tura rawn dilte pawh umzia zirtirna pe zel turin a chah a ni. Loan puktute pawhin a rulh lam an ngaih pawimawh a tul thu sawiin Pi Lily chuan thawktute leh member-te hmasawn tak tak tur chuan an zavaiin ke pen theuh a ngai a ni, a ti bawk.

Kum kalta 2013-2014 chhungin LDCU hnuaia society in-register te chu Training leh Seminar hmangin zirtirna pek an nih thin mai bakah thingtlanga Primary Society 61-te tan Cooperative Education, Training leh Seminar buatsaih a ni a. Lunglei khawpui chhung bikah chuan training neihpuiin anmahni hmun hmaah kalchilhin society dinhmun zirchianna neihpui an ni a, zaa 80% chu zawh hman a ni. He programme-ah hian society-te mamawh, zirtirna leh kaihhruai an ngaihnate hriatfiah a ni thin a, an tangkaipui zawk tura hmalak zel dan turte ruahmansak an ni thin bawk.

Vawiina LDCU Inkhawmpui 2014-ah hian an rorel zingah Annual Audited Balance Sheet 2012-2013 thlirhona leh pawpuina, Annual Budget 2014-2015 pharh leh sawihona bakah Bye-law siamthatna (Amendment of LDCU Ltd Bye-law) te sawiho a ni.

Attachment

  • Loading attachment...