Vawiin khan Lawngtlai District Sports Committee (LDSC) buatsaih Lawngtlaia state leh LADC sawrkar hnuaia department hrang hrangte intihhlimna, 1st Inter-Department Sports Meet 2016 chu LADC Hall-ah LADC Chief Executive Member Pu VL Hmuaka hovin khar a ni.

Khuallian Pu VL Hmuaka chuan Inter-Department Sports hlawhtling taka neih a ni chu state leh LADC hnuaia thawkte inkarah inlungrualna leh thawh hona tha tak a awmzia tilangtu a ni tiin, ram leh hnam tan inpawh tlang taka thawh ho zel a tul thu a sawi a. Infiamna hi ei zawnna tlak, nun tihlimtu, rilru leh taksa tihriseltu a ni tiin, sawrkar hna thawkte paw'n tha taka hna an thawh theih nan rilru leh taksa tihharh thar an mamawh ve reng a, chumi atan chuan heti ang sports meet buatsaih hi thil tangkai tak a ni, a ti bawk.

He Sports Meet kharna hi LDSC Chairman Pu C.Hrangthianga chuan a kaihruai a. Sports Meet chungchang report ngaihthlak niin, zaithiam zai ngaihthlak a ni bawk.

He hunah hian LADC-a Forest changtu Executive Member Pu KC Malsawmdawngliana bakah, LDSC member te, LADC leh state sawrkara department hrang hrang officer leh staff te leh thu thar theh darhtu eng emaw zat an tel.

1st Inter-Department Sports Meet, Lawngtlai 2016 hi October ni 25-27, 2016 chhung khan neih a ni a. State leh LADC hnuaia department 29 telin, infiamna chi hrang panga - badminton, carrom, chess, chinese checkers leh table tennis hmangin an inel a. A pumpuiah gold medal 4 lain Chief Medical Officer office an champion a. Gold 1, silver 2 leh bronze 3 latu District Rural Development Agency chu pahnihna niin; gold 1 leh bronze 1 latu Public Health Engineering Department chu pathumna an ni.