Vawiin khan State Election Commissioner Pu C. Ropianga hovin a pisaah 2012 Village Council inthlan thlirlawkna leh VC Electoral Roll Summary Revision chungchang ngaihtuahin sorkar mipawimawhte  an thukhawm.

District 6- Aizawl, Lunglei, Champhai, Kolasib, Mamit leh Serchhip huamchhunga Village Council term kal mek chu February ni 28, 2012-ah a lo tawp dawn tak avangin February, 2012 aia tlai lovah VC Inthlan  buatsaih a tul dawn a. He inthlan hi hlawhtling taka neih a nih theih nana thil pawimawh te vawiin meeting-ah hian ngaihtuahho a ni a. State Election Commission kaihruaina hnuaiah inthlan hma ngeiin VC Electoral Roll Revision neih tur a nih angin he Revision kalpui dan tur hi uluk taka sawiho a ni.

Dan awmsa angin he inthlan atan hian District tina DC te chu District Election Officer (DEO)  leh Appellate Authority an ni ang a, Addl DC te chu Electoral Registration Officer(ERO) niin District Local Administration Officer (DLAO) te chu Asst. Electoral Registration Officer (AERO) an ni ang. LAD Directorate chu he inthlan neih tur atan hian Election Directorate anga hman a ni anga, Electoral Roll print chhuah tur chu kum danga tih thin angin District khawpui theuha tih tur a ni ang. Draft Mizoram (Election to Village Councils) Rules, 2011 chu Law Department vet tura thehluh tawh niin 2012 Election neih tur atan hian hman a nih ngei beisei a ni.

Meeting-ah hian LAD Secretary Pu R. Liankima, SEC Secretary Pu P. Lianhrima, LAD Director  Pu Sangdingliana bakah District hrang hrang atangin DC aiawh leh District Local Administration Officer te an tel a ni.