Kristianten a kan hunpui krismas chu alo thleng leh dawn ta der mai, kum dang ang bawkin sorkar lam atang chuan halpuah tel lo Krismas leh Kumthar hi hman kan duh a. halpuah leh a kaihhnawih hian kan tan thil tha a thlen lo a, kan sakhuana nen inzawmna a nei bawk hek lo. Tul lova sum khawhralna, midang tana bengchheng/ ninawm mai anih avangin tumahin zuar lo tur leh hal lo turin kan in ngen a ni. Silai lem a mu kapchhuak thei, mit inkahchhiatsak theihna ang chite pawh zuar lo turin DC tin ten thupek; dan thlawhchhan neiin an chhuah a, thupek zawm lote hrem theih an nih avangin kan lo him zawkna atan mipuiten dan leh thpek kengkawhtute thu zawm turin ka ngen tak zet a ni.
Ruihhlo do chungchangah Central YMA/Police/ Excise & Narcotics Department te nen thawhhona duhawm tak siam a ni a, khawtlang a lo thianghlim zawka, mipui ten hlim tlang taka he hunpui hi an hman theihna turin tunah hian YMA Branch tinte uluk takin duty a ni a, ruihhloa buaite, zuruia buaina siamte krismas vuakveta mante chu a rei lo berah thla khat chhung Jail ah tantir tur an nih dawn avangin mi tin fimkhur turin ka ngen a ni.
Nausen lo piang champha lawm tura kan inbuatsaihnaah hian kan lawm (Isua Krista) rilru leh duh dan lova kal vak hi thil hlauhawm tak a ni a, amah hi remna lal anih angin he krismas ni kan hmanna ah hian Zoram hian remna leh muanna hnuaiah mite tana malsawmna kan nih theihna kawng hrang hrang ngaihtuahin induhsakna thilpekte mi chanhai zawkte chungah i hlan ang u.
Kum kalta lamah khan sawrkarin veng chhung cheia lawmmante siamin hun a buatsaih a, kan aizawl khawpuite a mawi ngei mai, kumin erawh chu chutiang chuan a ti ta lova, lawmman sawrkar lam atanga dawn tur a awm loh avanga kan vengte kan chei mawi lo a nih chuan Nausen a lo pianga chu kan hrechiang tawk lo a ni ang tih a hlauhawm hle a ni, chuvangin vengchhung tihfai leh cheimawi lamah pawh tan ila thar leh ang u.
Kumin 2016 chu damte in kan lo hmang ral leh mai ang a, a uihawmin hunpui lo thleng turte a nghahhlehawm hle lai hian hun inherin dan pangaiin a liampui leh mai dawn si a, chuvangin mitinin tun hun hi kan hman that a pawimawh hle a ni. Hun kal tawh chu a siamthat theih tawh loh a, nakin huna mi tur pawh tun kan hun hian a rawn herchhuahpui dawn avangin kan nitin hun hi a tha thei ang bera hmang turin i inbuatsaih thar ang u.
Zoram mipuite Krismas leh Kumthar lawmawm tak lo thleng tur hlim taka hmang turin duhsakna chibai ka buk a che u.
