71/2026-2027

Kolasib, 8th April, 2026: Vawiin khan Kolasib Bawrhsap Pu H. Dolianbuaia hovin Kolasib District chhunga Sorkar Department hrang hrang hotute an thukhawm a. He hunah hian Census 2027 atana inpuahchahna leh District hmasawnna tura hmalak dan tur hrang hrangte ngaihtuah ho a ni.

Kolasib District-a Principal Census Officer ni bawk Bawrhsap Pu H. Dolianbuaia chuan Census neih tur chu ngaih pawimawh a tul zia tarlangin, uluk leh fimkhur taka thawk turin hotute a chah a. Mipuite pawhin mahni in-report-na (self-enumeration) chu a hma thei ang bera ti turin a ngen a, self-enumeration tih theih hun chhung hi April 15, 2026 thleng chauh a nih avangin hma la thuai turin a chah bawk a ni.

He hunah hian Bawrhsap Pu H. Dolianbuaia chuan Kolasib District-a officer tha tak takte nena an inhmukhawm thei chu lawmawm a tih thu a sawi a. Kolasib District chu state dang nena ramri a nih avangin 'Law and Order' vawn that a pawimawh zia tarlangin, Mizoram pum tana ei leh bar luhka ber a nih avangin mawhphurhna a sang hle a ni, a ti.

Kolasib District hmasawnna turin sorkar Department hrang hrangte inpumkhat taka thawhho a ngaih thu sawiin, Bawrhsap chuan, "Department pawimawh lo a awm lo," a ti a. Zirna lamah te leh hmasawnna kawng dang dangah district ang zawnga tan rual a tul thu a tarlang bawk.

Tourism lam tihhmasawn chungchang ngaihpawimawh a tul thu tarlangin, Bawrhsap chuan Kolasib chu hmun nuam tak tak, Serlui leh Tuirial ang te awmna a nih avangin, khualzin mite tlawh tlak leh tlawh chak awm taka siam chu tum berah neih a tul thu a sawi a. Hemi denchhen hian Festival lian tham tak te huaihawt nise tha a tih thu a sawi bawk.

Mipuite nena inpawh leh zual taka sorkar hna thawh a tul thu tarlangin, Bawrhsap chuan hun lo kal zel turah DC hovin Department officer-te zin chhuah nise, chumi hunah chuan mipuite'n an mahni mamawh leh harsatnate awlsam taka an thlen theihna hun ruahmansak thin nise mipuiten an tangkaipui takzet a rin thu a sawi bawk.

Vawiin thutkhawmna ah hian Kolasib a Department hrang hrang aiawhte an tel kim hle.