4289/2025-2026

Dated Aizawl the 4th February, 2026 : Vawiin chawhma dar 11:00 khan Theatre hmanga hnam ziarang leh lemchan phochhuahna – ‘25th Bharat Rang Mahotsav 2026’ chu Vanapa Hall, Aizawlah National School of Drama, New Delhi leh Art & Culture Department, Govt. Of Mizoram tangkawpin neih a ni a. He hunah hian Pi Carol V.L.M.S. Dawngkimi, Director, Art & Culture Department chu khuallian a ni.

Khuallian Pi Carol V.L.M.S. Dawngkimi, Director, Art & Culture Department chuan thusawina hun hmangin ‘25th Bharat Rang Mahotsav 2026’ hmanna a kalkhawmte chu lawmna hun a hmang a. National School of Drama (NSD) nena thawhona tha tak an nei thei chu lawmawm a tih thu a sawi bawk. Institute of Music & Fine Arts (IMFA) hnuaiah Drama, Hnam lam, leh Music zirnate tih chantlun zel chu Mizoram Art & Culture Department chuan a tum thu sawiin, mi tam takin an hman tangkai tawh thu a sawi a. Heng zirnate hi mi tam zawkin an lo hriat a an lo tangkai pui zel thu a beisei thu leh School zirlaite pawh an tuina a nih phawt chuan IMFA hnuaiah hian rawn zir ve ngei turin a sawm a ni. Pi Carol V.L.M.S. Dawngkimi chuan National School of Drama nena thawhona tha zawk an neih zel theih a beisei thu a sawi bawk a ni.

He hunah hian Pu Shantanu Bose, Dean, National School of Drama chuan thusawina hun neiin, Mizoram chuan hnam zia rang ropui tak a neih thu leh hmun zau zawka phochhuah tham hnam rohlu tha tak tak a neih thu a sawi a. He Theatre Festival kaltlang hian hnam hausakna tam tak chu vawngnun leh phochhuah zel a nih ngei a beisei thu a sawi a. National School of Drama, New Delhi chuan Mizoram chu hemi kawnga thawhpui zel a duh thu a sawi bawk a ni.

‘25th Bharat Rang Mahotsav 2026’ hi Delhi January ni 28, 2026 khan neih tan a lo ni tawh. India ram hmun hrang hrangah hman tura kalpui chhoh zel niin Union Territory leh State zawng zawng ahte hman a ni dawn a. Ram pawnah pawh neih tura ruahman a niin Continent panga (5) ah hman tura ruahman a ni bawk. Bharat Rang Mahotsav hi khawvela Theatre Festival lian ber niin National School of Drama chuan hemi kaltlang hian Theatre Culture chawisan hi a tum a ni.

Vawiina ‘25th Bharat Rang Mahotsav 2026’ Vanapa Hall, Aizawla neihna ah hian National School of Drama chuan MacBeth William Shakespeare-a ziah ‘Flesh’ chu an entir a. Mizoram atangin Chawngmawii leh Hrangchhuana, Pu MS Ralte, Drama Instructor, IMFA Script ziah chu entir a ni bawk a ni. He hunah hian Sikulpui School zirlai leh zirtirtute bakah Institute of Music & Fine Arts (IMFA) hnuaia zir chhuak tawhte sawm an nih angin an tel thei a ni.