No.362/2021-2022

Dated Serchhip, the 2nd May, 2021:  Election Commission of India in a duan angin vawiin hian 26-Serchhip (ST) Assembly Constituency Bye Election vote tlate chu Counting Hall (DC Conference Hall) ah zing dar 8 atanga chhiar a ni a. Vote te hi tlai dar 3:00pm ah tluang taka chhiar zawh niin Zoram People's Movement Candidate Pu Lalduhoma chuan vote 8,269 hmuin thlan tlin a ni a, Returning Officer, Pu Kumar Abhishek, IAS, District Election Officer ni bawk chuan thlan tlin a nihna Certificate hi a hlan nghal a ni.

Information & Public Relations Department in Press Release hmasa lama kan lo tarlan tawh angin vawiina vote chhiar hna hi Micro- observer sawm, Counting Supervisor pariat, Counting Assistant sawm bakah Data Entry Operators leh Supporting staff ten Returning Officer leh Asst. Returning Officer te kaihhruaina hnuaiah vote tlate hi an chhiar a. Polling Station 29 a vote tlate chu Round ngaah chhiar niin round hmasa paliah Polling Station pasarih zel chhiar a ni a, round hnuhnung berah erawh Polling Station pakhat chauh chhiar a ni thung. Heng Polling Station te bakah hian Postal Ballot hmanga vote tlate chu Returning Officer hmaa Dawhkanah chhiar a ni bawk.  Mipui vote tla zawng zawng hi 16,367 niin Postal Ballot hi 188 a tla bawk a, Postal Ballot te hi Service Voters leh Absentee voters te vote tla an ni a, tichuan a vaia he inthlana vote nung zawng zawng chu 16,555 a ni. Vote thi (Rejected Vote) 40 a la awm bawk a, chungte nen chuan vote tla zawng zawng hi 16595 a ni thung.

Vote chhiar hi venhimna uluk tak hnuaia kalpui niin, vote chhiarna hmun leh a chhehvel hi thuah thuma ven a ni a, a chhehvela mipui punkhawm pawh phal loh niin, Covid19 laka himna dante pawh tha taka zawm chunga chhiar a ni. Mipuiten Media kaltlanga result an hriat zung zung theih nan Returning Officer's Media Room leh Bye Election Media Centre te tha taka buatsaih a ni a, result tharlam ber ber te hi rang takin Media mite hnenah hlan nghal zel a ni.

Candidate te vote hmuh dan kimchang chu hetiang hi a ni:

(A chunga Table-a vote te bakah khian Rejected vote 40 a la awm bawk)