No.471/2021-2022

Aizawl, 11th May, 2021 : Vawiin chhun dar 12:00 khan Pu Lalrinliana Sailo, Speaker, Mizoram Legislative Assembly chuan 26-Serchhip (ST) Assembly Constituency bye-election a thlan tlin, Pu Lalduhoma chu rinawmna thu tiam tirin Member of Legislative Assembly (MLA) atan a lalut.

Pu Lalduhoma lakluhna inkhawm hi Assembly Conference Hall, Assembly Annexe Building-ah neih niin, Pu H. Lalrinawma, Commissioner & Secretary, Assembly chuan a kaihruaia, he hunah hian Home Minister Pu Lalchamliana, School Education Minister Pu Lalchhandama Ralte bakah MLA-te Dr. ZR Thiamsanga, Pu Zodintluanga Ralte, Pu KT Rokhaw, Pu Lalrindika Ralte, Dr. BD Chakma, Pu Vanlalhlana, Dr. Vanlalthlana leh Pu Lalchhuanthanga te an tel a ni.

Pu Lalduhoma lakluh a nih hnu hian Assembly Speaker Pu Lalrinliana Sailo chuan 8th Mizoram Legislative Assembly-ah Mizo National Front (MNF) in MLA 27, Indian National Congress (INC) in MLA 5, Bharatiya Janata Party (BJP) in MLA 1, Zoram People's Movement (ZPM) in MLA 1 an neih thu leh Independent MLA 6 an awm thu puangin MLA thar lakluh inkhawm hi a titawp a ni.