Vawiin hian Serchhip DC Conference Hall ah 28^th Road Safety Week, 2017 chu Bawrhsap Dr. Lalrozama, IAS chuan a hawng. 

Dr. Lalrozama chuan, ramin hma a sawn zela lirthei pawh a pung zel a, lirthei khalh thiam hrim hrim pawh kan tam tawh hle a ni. Amaherawh chu danin a phut anga him leh rintlaka khalh dan hriatna kawngah erawh chuan hmasawnna tur kan la ngah hle lawi si a ni, a ti. Driver kan tih hian khualzin leh bungraw phurtu lirthei khalhtute ringawt kan rilruah a awm ang tih a hlauhawm a, lirthei tam zawk hi chu mimal leh chhungkaw bil ta a ni a. Mahni ta a nih hre ran chunga mahnia lo inzir thiam ve mai te kan nih fur bawk si avangin mimal lirthei khalhtu dan hriat leh fimkhur thua ngaihtuah awm tak tak kan tam hle a ni, a ti. Bawrhsap chuan lirthei khalhtu tam takten dawhtheihna an la tlachham deuh nia a hriat thu pawh sawiin, chetsualna tam tak hi chu dawhtheihna hmanga umbo theih nia a hriat thu a sawi a ni. 

He inkhawmah hian Pu Lalramliana Sailo, Member, Mizoram State Transport Authority chuan Road Safety Week, 2017 thupui, “Nang leh i chhungte an him theih nan, Lamlianah fimkhur ang che” tih thupui hmangin thusawina hun a hmang bawk. 

Week hawnna inkhawm hi District Road Safety Committee Member Secretary, Pu B. Lalrinsanga, Serchhip DTO ni bawk chuan kaihruaiin Week chhunga hmalak dan tur District Committee in a ruahman hrang hrangte a tarlang a. He Week chhung hian Serchhip a lirthei khalhtu, a bikin Public Service Driver te leh a duh apiang tan nilaini Dt. 8.2.17 hian training buatsaih a ni dawn a, Batch hniha kalpui tur a ni ang. Tin, lirthei enfiahna Police, Traffice  leh MVI tangrualte chu nei tura beisei an ni a, Serchhip-a Cable TV pahniha tihchhuah turin Talk Show huaihawt tum a ni bawk. 

Road Safety Week hawnna ah hian Serchhip a Zoram Drivers Union hotute, Rickshaw, Taxi, Sumo leh Truck Driver Associations hruaitute, District Officers hote, chanchinbumite leh tlawmngaipawl aiawhte an tel a ni.