Vawiin chhun khan Assembly Annexe Conference Hall-ah 29^thRoad Safety Week 2018 hawnna neih a ni a. Transport Minister Pu John Rotluangliana chu Khuallian niin Week thupui chu ‘Drive Safely, Save lives’ (Khalh fimkhur la, nun chhan him rawh) tih a ni.

Khuallian Pu John Rotluangliana chuan lirthei khalhtute hnenah dam chhunga road safety hmang turin a chah a. India ramah motor chetsualna vanga nunna chan an tam hle a, hei vang hian sawrkar laipui pawhin road safety a ngai pawimawh a, Group of Ministers on Road Safety Committee din niin Supreme Court pawhin Committee on Road Safety a din phah a ni, a ti a. Road Safety chungchang ngaihtuah turin State tinah Lead Agency din tur a ni a, Mizoramah pawh  Agency hi din a ni tawh a, an ni hian road safety-ah chak zawkin hma an la dawn a ni, a ti a. Kum 2016 khan Mizoram chhungah motor chetsualna vangin mi 70 an thi a, heng hi in report chin an ni a, kum 2017 khan mi 51 motor chetsualna vangin an thi bawk a ni tiin department hrang hrang tan rualna zarah zawi zawiin hma kan sawn a ni, a ti a.

Mizorama motor chetsualna chhan tam ber hi driver thiamloh a ni a, fimkhur a tul hle a ni, a ti a. Heng accident  hi kawng thatna hmunah te, kawng zau laiah te a thleng tlangpui a ni, a ti a. Minister chuan speed limit neih pawimawhna sawiin hei hian motor tlan chak lutuk tur leh tlan muan vanga hnunga mite tana ninawm khawpa motor khalhte a titlem dawn a ni, a ti a. Kan ramah kawngpui a lian lova, lirthei a tam si a, lirthei khalhtute tun ai hian kan hawihhawm a ngai a ni tiin motor dang nena kan in tawk anih pawhin tlawmngai zawk nih hian nunna tam tak kan chhan him thei a ni tih kan hriat a pawimawh, a ti a. Zurui chungin motor kan khalh tur a ni lova, hei hi dan bawh chhiatna a ni tiin kan accident tamna ber pawh hi zu leh ruihhlo dang ti chunga motor kan khalh vang a ni, a ti a.

“Driverte kutah hian nunna tam tak a innghat a ni”, tiin Transport Minister chuan cellphone hmang chung leh meizial zu chunga lirthei khalh lovin wrong side-a intlanpelh kan chin leh mi garage zawn leh kawng peng lai taka motor kan dah tlatte hi kan sim a ngai a, traffic sign hrang hrang tarchhuahte hi kan ngaih pawimawh a hun tawh a ni, a ti a. India ram state hrang hrangah two wheeler taxi kalpui chu Goa leh Mizoram chauh kan ni tiin tuna two wheeler taxi khalhtute hi batch hmasa ber in ni a, dan dik taka in khalh a pawimawh a ni, a ti a. Two wheeler taxi kan hman tangkai rualin sawiselna kan dawn hnem ber chu rate aia an inchhiar sang tih a ni tiin rate dik tak hmanga tlan tum turin a chah bawk a ni.    

29^th Road Safety Week hi February Ni 12 atanga Ni 18 chhunga neih tur a ni a. Mizoram States Road Safety Council buatsaih a ni. Road Safety Week chhung hian Panel Discussion, Live phone-in Programme leh Free Medical Check-up buatsaih a ni dawn a ni.

Transport Department Secretary Pu H.L. Rochungnunga chuan kalkhawmte lawmna thu sawiin Road Safety Week hi India ram hmun hrang hrang ah hman a ni a, United Nations thlengin ngaih pawimawh a ni, a ti a. Transport Department Jt. Secretary Pu Lalhmachhuana hovin Pledge taking neih a ni a. Transport Department Director, Pu R. Remmawia chuan  Mizoram medical statistics enin kum khat chhunga malaria leh tb natna vanga thi aiin motor accident vanga thi an tam zawk thu sawiin accident tlemna tura tan lak a ngaih thu a sawi a. Director hian lawmthu sawina in hun a khar a. Transport Department hotute leh hnathawkte, Traffic SP, I&PR Director, Public Transport Association hrang hrang- Zoram Drivers’ Union, Maxicab Association, Mizoram Govt. Drivers Association leh Aizawl City Bus Association etc. hotute, Two-wheeler Taxi Association hotute leh driverte an tel a ni.