Vawiin khan Mamit DC Conference Hall-ah Pu H.D Lalpekmawia SDO (Sadar) kaihhruaiin Mamita Road Safety Week 2018 hman dan tur rel a ni.

Road Safety Week 2018 hi February 12 -ah Mamit Field veng K.Lalsangliana Traffic Point-ah a hawnna Programme siam nise tih a ni a. Mamit District chhunga Drivers Association hrang hrang Member-te road safety chungchang inzirtirna hun hmang turin ruahmanna siam a nih bakah College zirlaite tan hian Road Safety Awareness Campaign neih bawk turin Committee chuan a rel.

Kumin 29th Road Safety Week thupui atan hian "Fimkhur takin khalh la, nun chhanhim rawh" tih chu a taka kalpui a nih theih nan Mamit DTO chu a remchang hmasa berah Road Safety chungchanga Motor khalhtute kokhawma zirtirna hun siamsak tura beisei a ni bawk. Vawiin Meeting-ah hian Road Safety Week hlawhtling taka hman a nih theih nan Department hrang hrangte chu mawhphurhna pek an ni a. Meeting hian Car flag leh leaflet bakah Road Safety Slogan buatsaih nise a tam thei ang ber semchhuak turin DTO Mamit chu mawhphurhna pek a ni a, hei bakah hian Mobile Checking neih tura ruahman a ni bawk.

Road Safety Week pual hian Mamit District Road Protection Squad pawh tharthawh leh tura hmalak dan tur sawiho a ni a. Kawngpuite a lo him zawk theih nan Squad Drive neih thin nise tih a ni bawk.

Kum 2017 khan Motor Accident/chetsualna vawi 64 a thlen thu tarlan a ni a, mi 51 te'n nunna chanin mi 30 te'n hliam an tuar a ni tih tarlan a ni bawk.

Vawiin Meeting-ah hian SP Mamit, DTO, CMO, DEO, Superintendent, Excise, SDO (PWD) bakah MVI Team-te an tel a ni.