3750/2024-2025

Aizawl dated 10th January 2025: Vawiin khan Transport Minister Pu Vanlalhlana chu Kaziranga, Assam-a 2nd Inland Waterway Development Council thutkhawm ah a tel a. Assam Chief Minister Pu Himanta Biswa Sarma leh Union Minister for Ports, Shipping and Waterways Pu Sarbananda Sonowal-ten he hun hi an kaihruai a ni.

He hunah hian Transport Minister Pu Vanlalhlana pawhin thusawiin, Mizoram chu tlangram a nih avanga mihring phur leh bungraw phurh luh lam ah harsatna an tawh thin thu a tarlang a. Inland Water transport changtlung tak hmangin heng harsatnate hi thui tak sutkian a nih theih tur thu a sawi a ni. Pu Vanlalhlana chuan Mizoramah lui lian, Inland Waterway kalpui theihna tam lo mahse a awm chhun te tangkai tak a hman a nih chuan inkalpawhna kawng a harsatna leh zin mite phurrit engemaw chen chhawk zangkhai a nih tur thu a sawi bawk a ni.

Thutkhawmna ah hian Pu Vanlalhlana chuan Mizoramah Inland Waterway Development hnuai a hmalak a nih chuan a ram leilung mi te hlawkpuina tur a ruahmanna siam ngaih pawimawh ni se a duh thu a sawi a. Inland Water Transport subject hi Transport department kut ah kum 2019 khan dah tan chauh a nih thu tarlangin Covid-19 avangin hmalakna chu engemaw chen tikhawtlai mahse a remchan dan ang angin bawhzui reng a nih thu a sawi a. Tuirial Dam chungchang tarlangin mihring leh bungrua phurh nan leh 2nd IWDC meeting-in tihhmasawn leh tihchangtlun a tum em em, River Cruise Tourism kalpui theihna hmun pawimawh tak a nih thu a sawi.

He meeting ah hian Inland Waterway Authority of India (IWAI) hmalaknate tarlan a ni a. State 21 leh UT tan Rs. 1405.26 Crore hu project hawnna neih a ni a, chung zingah chuan Mizoram a IWT project kalpuina tur cheng Vbc. 12.1 a tel a ni a. Quick Pontoon Opening Mechanism (QPOM) pahnih, Bihar leh Uttar Pradesh ami tlangzarh a ni. Central Database module leh certificate hrang hrang – Vessel Registration Certificate leh a pek dan turte, Annual Survey Certificate leh Inland Vessel Navigation Training Institute in a pek tur Course Completion Certificate te hawnna neih a ni bawk. Heng bakah hian National River Traffic & Navigation System (NRT&NS) hawnna neih a ni a, Top cargo onwers/ movers te hnen ah lawmawm sem a ni.

Minister hi Transport Secretary Pu Zosangliana leh Director Er. R. Lalrammawi ten an tawiawm a ni.

Mizorama Inland Waterway Transport project te chu IWT for River Tlawng, IWT for River Chhimtuipui leh Construction of IWT Infrastructure on Khawthlangtuipui – Tuichawng, Lunglei district-te a ni.