2001 January ni 15 a din tan 2nd I.R. Battalion Headquarters, Khawzawl chuan kar kalta Zirtawpni, 13 January khan an din champha lawmna hun Khawzawlah an hmang a. Home Minister Pu R. Lalzirliana leh Parliamentary Secretary Pu Lalrinmawia Ralte bakah Rural Development Director Pi Lianhmingi Pachuau leh Champhai DRDA Project Director Pu Zothanmawia te’n an hman pui a.Home Minister Pu R.Lalzirliana chuan martar te hriatrengna lungphun leh Community Hall a hawng nghal a ni.

Marter te hriatrengna ‘Martyr’s Memorial’ hi IR sipai zinga 10 lai Chhatisgarh a Naxalite te kuta ram leh hnam tana nun chan te hriatreng nan leh Mizoram Police Department hnuaia mi 51 lai ram leh hnam tana an nun hlantute hriatreng nan 2nd IR Battalion a thawktu zawng zawng ten an sum leh pai te thawhkhawmin an phun a ni.

Rural Development Department hnuaia Social Education Scheme atanga tanpuina leh Battalion-a an thawhlawm te nen tangkawpa sak Community Hall, RD Minister Pu R. Lalzirliana’n a hawn hi cheng nuai 29 zet seng a puitlin a ni a. A vang 45 ft, a dung 86 ft, a san zawng 42 ft niin in chungah hian Steel roof truss leh Dyna Roof hman a ni.