India ram puma hman 2nd National Handloom Day chu Mizoram ah pawh vawiin khan Commerce & Industries Minister Pu H. Rohluna hovin Vanapa Hall ah hman a ni a, Pu Joseph Lalhimpuia Parliamentary Secretary, Commerce & Industries; Pu Hmingdailova Khiangte, Parliamentary Secretary; Pu RL Pianmawia, Dy. Govt. Chief Whip; Pu PC Zoram Sangliana, Chairman MIFCO leh he department-a thawktu Officer pawimawh tak tak te leh Puantah lama eizawng tu te hawnna programme ah hian an tel kim hle.
Directorate of Commerce & Industries leh Weavers Service Centre, Govt. of India, Aizawl te tangkawp in an buatsaih 2nd National Handloom Day hawnna ah hian Vanapa Hall lobby, a chung leh hnuai ah nithum awh tur Handloom Exhibition chu hawn nghal anih thu leh Puantah leh thiam thil dehchhuahna kawnga hmalatu Commerce & Industries Department te hmalakna hlawhtling mek zel ah lawmthu khuallian Pu H Rohluna chuan a sawi a. Mizoram chhungah Handloom hi uar zel a ni in kum tin puantahtu te pawh an pun chhoh avangin in elna pawh a awm chho lo thei lo, chuvang chuan ti ve mai mai leh hna uluk lo te tan hmun a zim tual tual a, taima taka thawk leh design thar hmuchhuaka kuthnu mam te chu an ding chang chho mek zel a ni tiin design thar hmu chhuaka in tat hriam zel turin puantah tu te a ngen nghal.
Tuna Zoram chhunga puan deh chhuah mek te hi a tam zawk Acrylic La ( yarn ) hman anih avangin hmarchhak state bak hi hralh sum ah a pel thei lova, ram pawn leh khawvel hmun danga thawn chhuak tur chuan Natural Fiber heng Cotton, Silk leh Wool te hmanga puan tah a nih loh chuan ram hla leh hmun hla a pelh theih loh thu Minister chuan sawiin puantahna hnawng mai tur ven dan ngaihtuah turin ‘Handloom Research and Promotion Council’ din a hmalak tum anih dan leh chumi bawhzuia tihchangkan nan State Sorkar chuan District hrang hrang huap lawmman ‘Award’ Certificate leh sumfai keng tel buatsaih tum anih dan leh khawvel hmaa pho chhuah tlak ngei siam chhuah a tul thu a sawi.
Thenzawl Handloom Complex-a Mizoram Handloom Export Fecilitation Hub dinna Rs Nuai 8,371 ruahman anih dan leh ASIDE Scheme hnuai ah 1st Installment atan Rs. Nuai 115 chiah pek chhuah hman a nih laiin Sorkar laipui chuan a rawn tih tawp tak avanga chhunzawm thei lo tura ngaih laiin Mizoram Chief Minister thahnemngaihna in New Economic Development Project hnuaiah sum mamawh la bang zawng Rs. Nuai 7.221 chu ngaihtuah sak an nih thu Pu H. Rohluna chuan sawiin tunah chuan sak puitlin theih anih dawn tak avang leh hmasawnna pawimawh tak a nih avanga lawmthu a sawi.
Vawiin programme Pu Zothankhuma, Secretary & Commissioner, Commerce & Industries Department kaihhruaiah hian khual zahawm Pu Joseph Lalhimpuia, Parliamentary Secretary pawhin thu a sawi a. Pu J. Hmingthanmawia, Director, Commerce & Industries in programme tawpah lawmthu a sawi a. Khuallian ho hian Vanapa Hall Lobby a Handloom Exhibition chu an thlir ho nghal a ni.
