Tun hnai khan chanchinbu thenkhatah Kawmzawl-a 33kv Sub-Station siam tur chungchangah thudik hlel deuh hlek chhuah a nih avangin SE(P&E), Lunglei Power Circle chuan a hnuaia mi ang hian thuchhuah a siam a ni :

“Kan hriat theuh angin chhimlam District pathum - Lunglei, Lawngtlai leh Saiha - te hian kawlphetha an hmuhna hnar chu 132kv Sub-Station Lunglei (Khawiva) hi a ni a, hetah hian 20MW dawng thei Power Transformer te hman mek an ni. Mamawh lo pung chho zelah hian, transformer-in dawn theih zat kawlphetha za-a 80% kan hmang mek a, reilote-ah a phurh zawh bak hi mamawh a ni thuai dawna chhut a ni bawk. Khawiva Sub-Station hi tihlen zel theihna hmunhma awm mahse, a kalkawngte a harsat avangin, a kawppui tur leh tanpuitu tur mamawha hriat a ni a. A tanpuitu tur atan 132kv Sub-Station neih belh rawtna chu ni 11.2.2014-ah Department hotute hnenah thehluh a ni a. Ngun taka ngaihtuah a nih hnuah Sub-Station pahnihna tur chu Kawmzawl-a 33kv Sub-Station siam leh a tul anga 132kv-a tihlen zel turin remtih a ni ta a ni. Mizoram sorkar pawhin phalna pein, a siamna tur sum mamawh pawh ‘Special Plan Assistance’ hnuaiah ruahman sak tura rawtna a thlen nghal a ni. Kawmzawl-a he Sub-Station siamna tura a ram phal taka petu Pu V.Hrangchungnunga, Pukpui chungah P&E Department chuan lawmthu a sawi bawk a ni.

Mizoram sorkar bakah Sorkar Laipui pawhin a pawm tak hnuah hna hmanhmawh thlak a nih avangin, pawisa hman phalna (Expenditure Sanction) awm hrih lo mahse, a hmun laihzawl tal hi tih zawh thuai thaa hriain, a laihzawl hna hi ni 15.10.2014 khan tan a ni ta a ni.

He Sub-Station thar hi Khawiva Sub-Station thlaktu tur ni lovin, a puitu tur a ni a. Chu mai bakah, Sub-Station thar leh Khawiva hi thlunzawm tur a nih avangin a tul anga inpuitawn thei tura siam a ni bawk dawn a ni.

He ruahmanna hi zawh a nih hunah chuan chhimlama District pathum harsatna awm thinte leh la awm turte a sutkian beisei a ni a. Hetianga Mizoram sorkarin chhimlam tana rotling min pek hi mipuiten lawmna chang hriat a, P&E Department hnathawh thlawp tha turin leh Electric Bill pek lamah taima sauh sauh turin P&E Department chuan mipui zawng zawng a ngen a ni.”