Tun thla Nov ni 15 atanga ni 17 chhunga neih North East Agri Expo vawi 3-na, Dimapur-a hman zawh takah Mizoram Agriculture Director, Dr. C. Lalzarliana leh Agriculture Officer dangte an tel.

He Agri Expo hi India hmarchhak State 8 ten Agriculture leh a kaihhnawih Department hrang hrang hnuaia hmasawnna an neih te inhriat tawnsakna tur leh chumi hmanga thil thar chhuah lei leh hralhna kawng dap a nih zel theihna tura hmalakna a ni. India hmarchhak State-te zingah Mizoram, Assam, Tripura, Sikkim, Nagaland, Arunachal Pradesh te chu he Expo-ah hian an tel thei a. Mizoram atanga pho lan, Oil Palm rah, Zawlaidi leh Anthurium te chuan mipui a hipin Mizoram Pavilion chuan tlawhtu a ngah hle.

He Expo hi US Senator Paul Strauss bakah Laos People Democratic Republic atangin Vice Minister, Dr. Phat Phompiphak te pawhin an hmanpui a, kuthnathawktute tana buatsaih Seminar, Exhibition leh programme pawimawh tak tak a awm bawk a, Mizoram Stall hi mi pawimawh tak takin uluk takin an rawn tlawh a, U.S Senator te, Asian Country atanga Ambassador lokal hote phei chuan an hlut zual hle a, Malaysia a ambassador phei chuan Oil Palm rah thatak kan phochhuahte a han hmuh chuan a phur hle a, " Inramah Oil Palm a that theih phawt chuan Malaysia ramin kan tangkaipui ang bawkin in tangkaipui ngei ka beisei" tiin duhsakna a hlan nghe nghe a ni.

Director Dr.C.Lalzarliana hian Nagaland hmun hrang hranga Agriculture activities te a tlawhkuala, hmun hrang hrangah Terrace cultivation hlawhtling taka an lo tih leh chunga buh thataka an lo ching thei chu hmuhnawm hlein a hria a. Mizoramah pawh Terrace-a buh chin hi kan uar deuh deuh a pawimawh hle in a hria. Mizoram Farmers leh mithiam dangte pawhin an hnathawh dan te hi a hmuna la tlawh ve tul hle in a hre bawk.