No.5634/2020-2021

Vawiin khan 46 Assam Rifles chuan AR Ground ah Mahatma Gandhi pianchamphaphak pualin mau phun beihpui ‘Bamboo Plantation Drive’ an buatsaih a, Home Minister Pu Lalchamliana chu khuallian a ni.

Home Minister Pu Lalchamliana chuan Gandhi Jayanti puala mau phun beihpui ‘Bamboo Plantation Drive’ Assam Rifles ten an buatsaih chu lawmawm tiin hlawhtling taka an kalpui ngei a beisei thu a sawi a, Mizoram Sawrkar pawhin ram hmasawnna turin mau lamah nasa takin tan a la mek tih a sawi. Pu Lalchamliana chuan Mizoram Sawrkar hmalakna sawiin SEDP leh NBM kaikawpa Bamboo Development Programme hnuaiah tun dinhmunah beneficiary 214 an awm mek thu leh tissue culture hmanga tihpun mau phun tur 81,000 semchhuah a ni tawh tih a sawi a. Mizoram Sawrkar hmalakna pui ber SEDP hnuaiah mau lama hmalakna atan kum 2019-2020 chhung khan cheng nuai 131 dah a ni a, sawrkar laipui NBM kaltlangin cheng nuai 350 dawn niin NEC hnuaiah cheng nuai 1300 sanction order nghah mek a ni, a ti.

Assam Rifles hian hmun hrang hrangah thingphun an uar hle a. Tun hnaiah hian Zokhawsang leh Mizoram khaw hrang hranga an hmunpui leh post-ah te thing leh mau an phun nual a ni.

Vawiin Assam Rifles buatsaih Bamboo Plantation Drive hawn ni ah hian Mizoram chhunga Assam Rifles hotulu ber Brig.Vinod S., Commander, 23 Sector Assam Rifles leh a hote an tel a ni.

Attachment

  • Loading attachment...