Prime Minister hova Union Minister leh State Chief Minister zawng zawng te telna Eleventh Plan Mid-Term Appraisal - National Development Council (NDC) vawi 55-na, ni 24 July, 2010-a New Delhi-a neihna ah Mizoram Chief Minister Pu Lal Thanhawla chuan thu sawiin Eleventh Plan-in a tum bulpui ber hmasawnna huapzo - thingtlang mi rethei thleng phaka ruahmanna siam chu tha a tihpui thu leh policy hrang hrang neia sorkar hmalakna te chu a thlawp tlat thu a tarlang a. A bik takin programmme hrang hrang te hlawhtling taka kalpui a nih theih nan agriculture leh rural development sector-a programme te chu mipuite tel ngeia hmalakpui ni se tha a tih thu a sawi lang bawk. Ministry of Power chu tribal state hnufualte dinhmun leh mamawh thlir chunga ruahmanna siam thin turin a ngen a, India hmarchhak tihhmasawnna tura duan - NER Vision 2020 chu a lo hlawhtlin ngei theih nan sorkar laipui chuan hmasawnna ruhrel siam hna chak zawkin kalpui tul a tih thu a tarlang bawk. Tin, programme liantham kalpui reng rengah ram kilkhawra awmte tan project thawh chhoh kawngah harsatna hrang hrang an tawh thin te hriatthiampui a, ram puma inangtlanga hrutrual thin chuan rokhawlhna a siamsak thin dan te a sawifiah bawk. Centrally Sponsored Schemes (CSS) hrang hrang hnuaia sum dawn tur te tana State lo do let ve na tur siam thin chu inangkhata 90:10-a khairual ni se tih te chu Chief Minister chuan a rawt a. Normal Central Assistance hnuaia Planning Commission-in central share fund a pek chhuah dawna tihhlawhtlin tur bituk (conditions) hrang hrang a siam thin te chu khawng taka kalpui lova, fund pekchhuah ni zel zawk tawh se tih te Chief Minister chuan ram hruaitu kalkhawmte hnenah a thlen bawk a ni.