Vawiin khan Chhimveng YMA Hall, Mamit-ah Mamit Forest Division bultumin 63rd National Wildlife Week, 2017 hman a ni a. Pu H.Lianzela, Addl.DC, (DC charge la mek tu) Mamit District chuan khuallian niin a hmanpui.
Khuallian chuan thu sawiin nungchate humhalhna kawngah zirlai naupangte'n pawimawhna thuk tak an nei a, an rilruah nungcha humhalh an duh tlat chuan chhungkua a danglam anga, chu chuan khawtlang a tidanglam mai dawn tih sawiin nungchate hian mihringte nunah pawimawhna thuk tak an nei a, englai pawha boruak kan mamawh avangin clean environment kan mamawha chumi atan chuan ramngaw leh nungchate kan humhalh a pawimawh a ni a ti.
Kan Sa ei tam avanga kan natna tawh thin hrang hrangte sawiin Sa te'n kan hriselna an tichhia a, kan habit thlengin a tibuai a, chuvangin Vegetarian nih tum turin kalkhawmte a chah bawk. Eng mi pawh ni ila kan awmna zawn theuha thil tha lo kan hmuhte sawichhuak ngam tur leh kan environment tichhetu ni lova humhalhtu ni zawk theuh turin zirlai leh zirtirtu kalkhawmte a sawm bawk a ni.
Pu Lalnunsanga Khawlhring, DFO Mamit-in Keynote Address pein Wildlife Week Celebration chu Kum 1952 atangin Mahatma Gandhi piancham denchhena neih a nih tawh thin thu sawiin ramsate hi kan ran vulh thin te aiin a hrisel lo zawk a, natna hrik hrang hrang pai thinin TB vei pawh tam tak an awm thu a sawi a, ramsate ei mai mai a him lo a ni a ti. Mamit District bikah nungcha humhalh kawngah theihtawp an chhuah thu leh School hrang hranga zirlaite zirtirna pek an nih tawh bakah School dang pawh tlawh zel an tum thu sawiin National Wildlife Week pualin Mamit khua leh Mamit District chhung Range zawng zawngah zirlai naupangte tan Painting Competition an buatsaih thu sawiin lawmman 1 na atanga 3 na bakah a ziak zawng zawngte Participation Prize an pek vek dawn thu a sawi bawk.
He hunah hian National Wildlife Week puala Painting Competition lawmman semna neih nghal niin Immanuel Lalrawngbawla, Govt Mamit High School chuan lawmman 1 na niin Zothanpuia, Govt Mamit High School chu 2 na niin Jeffrey V.L Nunpuia Govt Mamit High School chuan lawmman 3 na a dawng bawk a ni.
He hun hi Pu Zatluanga Sailo, President Sub-Hqrs YMA, Mamit-in kaihruaiin Pu Lalthangkima, HA, SDEO Mamit-in hunserh a hmang a. Pu Lalzuiliana, RO, Mamit-in kalkhawmte hnena lawmthu sawina a nei bawk.
He hun hi SP Mamit, Commandant 4th IR, President, Joint V.C Mamit te'n telpuiin khawpui chhung school hrang hranga zirlai naupangte leh zirtirtute an kalkhawm a ni.
Attachment
- Loading attachment...
