DIRECTORATE OF INFORMATION & PUBLIC RELATIONS, Government of Mizoram, India

1682/2025-2026

Siaha the 15th August, 2025: India ramin zalenna a hmuh champha vawi 79-na (79th Independence Day) chu Siaha-ah pawh SDFA Ground Meisatla-ah ropui taka lawm a ni a. Health Minister Pi Lalrinpuii chu khuallian niin Hnam puanzar a pawt pharh a, parade contingent 23 te chibai bukna a chhanglet.

Health Minister Pi Lalrinpuii chuan Independence Day vawi 79-na ropui tak leh chhinchhiah tlak tak denchhenin Siaha District mipui zawng zawngte duhsakna chibai a bûk a, India-in zalènna a neih theihna tura sûlsutute zawng zawng inpêkna leh inhlannate hre thar lehin an thawhrimna avanga tun dinhmun thleng thei leh thlamuang taka awm thei an ni tih hriaa, zalènna chhawm nung zel turin District mipuite a sawm a ni.

Minister chuan Sawrkarin mipuite rawng a bawlna kawnga a hmalakna hrang hrang tarlanna a nei a, Ruihhlo leh HIV/AIDS in Mizoram a run mek a, India ramah HIV/AIDS prevalence san berna a ni mek bawk chu a veiawm takzet a ti. Mizo thalai tam tak chu ruihhlo bawihah an tang mek a, an tang thar zel bawk tih sawiin ruihhlo leh HIV/AIDS in kan ram leh hnam a ei chhiat vek hmain tan la thar theuhin, Sawrkar, Kohhran leh NGO hrang hrangte pawhin theihtawp chhuah zelin, chhungkua atanga bul tanin , ram leh hnam innghahna, Kan tu leh fate chu ruihhlo leh AIDS lakah theihtawpa venga ti chhin lo tura vengtu ni theuh turin kalkhawmte a sawm bawk a ni. Minister thusawi kimchang chhiar duh tan a hnuaia link-ah hian tarlan a ni.

https://dipr.mizoram.gov.in/post/speech-of-pi-lalrinpuii-on-79th-independence-day-2025-at-siaha

79th Independence Day lawmnaah hian lawmman chi hrang hrang sem a ni a:

1) Armed Contingents zingah Mizoram Police leh Mizoram Home Guard & Civil Defence te chu participation prize hlan an ni.

2) Unarmed Contingents zingah pakhatna lawmman dawngtu chu NCC, Don Bosco School te an ni.

3) School Contingents zinga lawmman dawngtute chu:

1st: GHSS, Siaha

2nd: Auxilium English School

3rd: Lorrain English School te an ni

4) WCD buatsaih Beti Bachao, Beti Padhao puala Siaha District atanga kumin HSLC leh HSSLC a distinction + Letter marks in all subjects hmu te chawimawina lawmman sem nghal an ni.

Independence Day lawmna programme hman zawh hian MADC CEM, Pu M Laikaw huaihawtin CEM Bungalow-ah sawmbikte nena thingpui inhona neih chhunzawm nghal a ni.

Attachment