No.2356/2021-2022

Aizawl 27th Sept, 2021 : Vawiin khan DC Conference Hall, Mamit-ah Tripura atanga rawn kir 8th Batch Bru Repatriated Fix Deposit Certificate chu Dr. Lalrozama, IAS District Bawrhsap chuan a hlan.

Dr. Lalrozama chuan Tripura Relief Camp hrang hrang atanga Bru lo let te chu Fix Deposit bak Sawrkar atanga chhawmdawlna dawn a awm tawh dawn loh avangin, an pawisa dawnte chu tangkai tak leh dinchhuahpui ngei nan bakah mahni kutke a ding tura rilru fim tak nena hmang turin a chah a. An awmna khua theuhah khua leh tui tha tak ni tura chahin, rilru nghet tak pu-a Mizoram chhungah thlamuang taka awm turin a chah bawk.

District Bawrhsap chuan Mamit District hian mawina riau kan nei a, hnam hrang hrang chengte lungrual taka kan khawsak ho-na hi kan mawina a ni tiin kan chhawmnun zel a pawimawh hle a ni a ti. Bru unaute chu naupang hri danna pek leh zirna lamah pawh theihtawpchhuah zel turin a sawm bawk.

Vawiina tanpuina pek chhungkaw 13 te hi Tripura atanga an rawn let atanga chatlak miah lova Mizoram-a kum thum chhung awmte an ni a. Chhungkaw khat erawh Tripura-ah an let leh avangin tanpuina hi an dawng ve thei dawn lo a ni.

8th Batch Bru Repatriated-a hruaikir te hi an rawn let atanga kum hnih chhung thlatin Rs. 5000/- (Sangnga) Monthly Assistance pek an ni a, Free Ration pek an nih bakah In sakna tur tanpuina Rs. 1,50,000/- (Nuai khat singnga) pek an lo ni tawh bawk. Kum thum an awm tlin chiahin Apex Bank-a Fix Deposit an dah lakchhuah theihna certificate pekchhuah an ni. Vawiin-a Bank Certificate pekchhuah hi chhungkaw khat tan Rs. 4 lakh bakah kumthum chhunga a pung nen an la chhuak thei dawn a ni.

Vawiin hian Ration Card pangngai la neilote pek nghal an ni bawk.

Vawiin-a Bru Repatriated Fix Deposit certificate pekchhuahna-ah hian Project Director, DRDA, Bru Repatriation Nodal Officer, anmahni Bialtu AO theuhte, Apex Bank Manager bakah DIPRO, Mamit te an tel a ni.

Attachment

  • Loading attachment...