Vawiin chhun khan sa thianghlim leh hrisel zawrhna (Modern Meat Shop) Meat Marketing Network hawnna inkhawm Animal Husbandry and Veterinary Department Conference Hall-ah neih a ni a, A.H. & Vety. Minister Pu Nihar Kanti Chakma chu khuallian niin, Pu T.Sangkunga, Secretary, Vety. department chu khual zahawm a ni.
Minister Pu N.K.Chakma chuan Vety. Department-in Sa hrisel leh thianghlim zawrhna 'Modern Meat Shop' a hawng thei ta chu lawmawm a tih thu leh ram changkang leh hmasawn kan nihna kawnga rahbi chhinchhiah tlak pawimawh tak pakhat a nih thu a sawi a. Minister chuan Sa zawrhna dawr tharte hi mipuiten sa thianghlim leh hrisel kan ei theih nana ruahman a nih thu leh hei hian sa thianghlimlo leh hrisel lo kan ei avanga natna chi hrang hrang kan kai thin te pawh a tihbo a beisei thu a sawi bawk.

Vety. Department Secretary Pu T.Sangkunga pawhin thu sawiin he Aizawl sa zawrhna changkang siam tur hian kumin February thla atanga hma lak tan a nih thu a sawi a, Department a thawktute thahnemngaihna leh tanrualna avanga reilote chhunga a hlawhtlinna hmun theih a lo ni ta chu a lawmawm a tih thu a sawi bakah Department hmachhawp hrang hrangte a sawi bawk a ni.

Inkhawm hi Dr. L.B.Sailo, Director, A.H.&Vety Director-in kaihhruaiin Dr. Dailo David Varte, Deputy Director, A.H.&Vety in technical report a pe a, inkhawm zawh hian Minister hovin Department hotute leh thuthar lakhawmtuten Chaltlang, Bawngkawn leh Ramhlun Vengthara Sa dawr tharte chu a hmunah enfiahin an tlawh nghal a ni.

Meat Marketing Network hnuaiah hian Aizawl khawpui veng hrang hrang hmun 11 - Bawngkawn, Ramhlun Venglai, Chaltlang Dawrkawn, Chanmari, Zarkawt, Dawrpui, Treasury Square, Sikulpuikawn, Dinthar, Vaivakawn leh Khatla-ah te Sa zawrhna dawr hi siam phawt a ni a, a hlawhtlin dan a zirin hmun hrang hrangah dawr siam belh tura ruahmanna siam mek a ni bawk. Heng sa dawr ah te hian vawiin atang in sa thianghlim leh hrisel engtiklai pawha lei theih tura hralh chhuah nghal a ni a, bazar sa rate pangngai aia Rs. 10/- a to in hralh a ni ang. Heng dawra sa zawrhte hi talh an nih hma leh talh an nih hnu thlengin Vety Doctorten a thianghlimna chungchangah enpuiin an vil reng thin dawn a ni.

Ran talhturte hi Department-in a leikhawl dawn lova, a supply turin mi pahnih - Vawk supply turin Pu K.Vanlalmawia leh Bawng supply turin Pi M.C. Heleni-te thlan an ni.

Department hian Bung Bungalow-a Slaughter House (ran talhna in) neihsa bakah tunah hian Aizawl chhim lamah Slaughter House changtlung zawk sa turin ruahmanna a siam mek a, hei bakah hian district tinah Slaughter House sa tur hian ruahmanna kalpui mek a ni bawk.