No.6102/2020-2021

Khawzawl, the 15th October, 2020: Khawzawl District Deputy Commissioner leh District Magistrate Pu Zothanmawia MCS thupek bawhzuiin Covid-19 chungchanga sawrkar thuchhuah hrang hrangte mipuiten an zawm tha em tih Khawzawl chhunga veng hrang hrangah Zonal Officer, VLTF leh Police te'n tunkar chho hian sawilawk lovin an endik.

October Ni 12, 2020 khan Hermon, Electric, Darngawn leh Arro Vengte endik a ni a. A tuk October 13, 2020 khan Dinthar, Kawnzar, Zuchhip leh Zaingen Vengte endik ni ve lehin, nimin October Ni 14, 2020 khan Vengthar leh Lungvar Vengte endik a ni bawk.

Hetianga sawilawk lo a endiknaah hian dawr leh sumdawnna hmuna dawrtute hming, biakpawh theihna leh address chuanna Register vawnte, public transport khalhtute, Restaurant leh thingpui dawr, inchhung leh pawna infiamna hmun bakah mipui vantlangin mask vuah, hand sanitizer hman leh social distancing vawnte an zawm tha em tihte endik a ni a. Endikna atanga a lan danin a tlangpuiin mipuiin sawrkar thuchhuahte an zawm tha a. Chutihrualin dawrkai leh sumdawng thenkhat, register a phone number leh address dah mumal lo an awm tih hmuhchhuah a ni a, sawrkar thuchhuah zawm lo mi thenkhatte chu dan anga pawisa chawitir zel an ni.

Endikna thawhkhatna hi thla hmasa September ni 16-18, 2020 chhungin neih a lo ni tawh a. A khat tawkin endikna hi neih chhunzawm leh tur a ni ang. Covid-19 hripui leng mek a darh zel lohna tura fimkhur zui zel turin District Level Task Force on Covid-19, Khawzawl District chuan mipuite a chah a ni.