Vawiin hian Association for Voluntary Blood Donation (AVBD), Serchhip, District Hospital Blood Bank leh Mizo Zaimi Inzawmkhawm Pawl (MZI) Serchhip Hqtrs. ten CMO Conference Hallah “Show Love, Give Blood” tih thupuia hmangin thisen pek runpui an nei a, Pu Chuauhnuna, MCS, Addl. DC Serchhip chuan khuallian niin a hmanpui.

Khuallian chuan Valentines Day puala thalai intel khawmten thlawna thisen pek runpui an buatsaih chu lawmawm a tih thu sawiin, thisen pe tur kalkhawmte chu Pathian tihna nena Valentines Day hi thianghlim taka hmang turin a sawm a, he hun hi thalaite tan hun hlu tak anih thu leh he ni hi thangthar lo kal zel turte pawhin uar takin an la rawn hman chhoh zel a beisei thu a sawi bawk.

Tv. Zonunsanga Kawlni, Vice President, AVBD Serchhip chuan AVDB hmalaknate sawiin, tunhma aiin Serchhip Hospital Blood Bank-a thisen an mamawhna a san tawh thu a sawi a. Nikum April thla atanga vawiin thleng hian Serchhip Hospital Blood Bank-ah Thisen Unit 910 pek tawh niin, tlawmngaia thisen pek (Voluntary Donation) hi Unit-731(80.40%) a ni a, Thisen inthlakthleng(Replacement) tura pek Unit-179 (19.6%) anih thu a sawi.

Hemi hnu hian thisen pek runpui neih chhunzawm nghal niin Mipa–43 leh Hmeichhia - 35 ten thisen unit - 78 an pe a, Blood Donation Camp neih chhung hian MZI Serchhip ten thisen petute hi zaiin an awi reng bawk a ni.

He hun hi Zolianmawia, President, AVBD Serchhip chuan a kaihruai a, Pu Laldawngliana, CMO, Pu ZD Lalmuanawma, DMS leh Pu K. Sailtluanga, MIS, DIPRO ten an telpui a ni.