1872/2022-2023

Aizawl, the 9th September, 2022: Election Commission of India thuchhuak angin vawiin khan DEO/DC Aizawl leh Jt. CEO Office tangkawpa huaihawt ‘Aadhaar Collection Special Camp/Campaign’ chu Pachhunga University College hmunah neih a ni.

Representation of the People Act, 1950 siamthat (amend) a nih hnuah electoral roll-a hming chuang tawhte chuan an aadhaar number chu registration officer hnenah an hriattir/thehlut thei tih a ni a. Hemi bawhzui hian Election Commission of India chuan thuchhuah siamin elector tupawhin an aadhar number hi an thehlutin an electoral roll/EPIC nen an link thei a, amaherawhchu, hei hi tihluihna nilo in elector-te duhthlanna zawk anih thu a tarlang a ni. He aadhar number link/lakkhawm hi 1st August, 2022 atanga tan tura tih a ni a, vawiin 9th September, 2022 leh 23rd September, 2022 khian Special Campaign neih a ni ang.

District Election Officer/DC Aizawl leh Jt CEO Office tangkawp chuan Pachhunga University College-ah PUC College zirlaite hun hmanpuiin, Aadhar leh EPIC thlunzawm pawimawhnate hrilhfiahin, campus registration hun hman nghal a ni a. He hunah hian Aizawl DC/DEO Dr Lalhriatzuali Ralte, IAS, chuan thusawina hun a hmang a, ACEO Pi Laldinfeli-in ECI atanga thuchhuah pawimawhte a tarlang a, Election Officer Pi V. Lalmuanpuii’n programme hi a kaihruai a ni.

Aadhaar number registration leh link hian electoral roll-a mi pakhat Assembly Constituency pakhat aia tama inziak lutte a chhuichhuak thei dawn a, hei hian nasa takin electoral roll felfaina kawngah leh a thianghlimna kawngah a pui dawn a, chuvang chuan a pawimawhna hre rengin ngai pawimawha lo link/register theuh turin DEO chuan mitinte a sawm nghal a ni.

Vawiina campus registration hunah hian PUC faculty leh zirlai thahnem takin registration an tinghal a, Veng tinah Booth Level Officer-ten he hun hi an hmang ve nghal bawk a ni.