2494/2025-2026

Siaha the 18th September 2025 : Ministry of Tribal Affairs (MoTA) hmalakna pakhat Tribal mite chawikanna tura duan Aadi Karmayogi Abhiyan chungchang inhrilhhriatna, Ni hnih (2) chhung awh tur, District Process Lab chu vawiin khan DRDO Conference Hall, Siaha-ah tan a ni a, Pi Zorinsangi, SDC leh District Nodal Officer ni bawk chuan he hun hi kaihhruaiin Pu Abraham Beirazi Khithie, Addl DC chuan a hawng a ni.

Pu T Roumuan Paite, Joint Secretary, Ministry of Tribal Affairs & CMD, NSTFDC hnen atanga Aadi Karmayogi chungchang thuchah video tawi thlirhona neih hmasak a ni.

Video tawi thlirhona neih zawh hian Addl DC chuan thu sawi zuiin Aadi Karmayogi chu India Sawrkar in Kum 2047 a ram intodelh (Vikshit Bharat- 2047) ni tura a in buatsaihna tam tak zinga peng pakhat a ni a ti a, Ram hmasawn ni tur chuan mi zawng zawng huap hmasawnna a awm a tul a, chu chu Sawrkar pawhin hriain tlang rama cheng tribal mite hmasawnna turin hma a la nasa hle, a ti. Hmasawnna rualkhailo chu hmasawnna tluantlung a tling lova, Sawrkar atanga hmathatna dawn tur awm te chu a lian ber atanga a te ber thlengin an hmuh theih nana he programme hi duan a ni a ti.

NGO aiawh kalkhawmte chu Sawrkar leh mipui inkar palai hna thawktu an ni a, Sawrkar khalh ngil kawngah leh a tul ang apianga mipuite tanpui tur an ni tiin he scheme kalpuina turah an thawhpuina a ngen a, duhsakna a hlan chhunzawm nghal bawk a ni.

Karmayogi Abhiyan hnuaia District Process Lab ah hian District Master Trainer te chuan District Nodal Officer kaihhruaina hnuaiah Block Master Trainer 10 te chu training an pe dawn a, Block Master Trainer te hian Block Level Nodal Officers te kaihhruaina hnuaiah thingtlang mite an zirtir leh dawn a ni.

Aadi Karmayogi Abhiyan – Responsive Governance Programme chu danglamna thlentu mi nuai 20 chher chhuahna tura duan a ni a. Khaw tinin anmahni khaw hmasawnna tur an duan thiam theihna tura zirtir te, chumi tihlawhtling tura sawrkar scheme hrang hrang thawh ho tir te a tum a ni.