2473/2023-2024

Aizawl, the 24th October, 2023: Vawiin chawhnu dar 3 khan Addl. Chief Electoral Officer kaihhruai State Level Media Certification and Monitoring Committee (MCMC) chu an Chairman Pu H. Lianzela, Addl. CEO hovin Pre-certification dilna lutte ngaihtuahin State Media Centre, CEO Office-ah an thukhawm.

Addl. CEO Pu H.Lianzela chuan political advertisement pre-certification tih ngai dilna lutte ni hnih chhunga tihfel hman tura hmalak a nih thu a sawi a. Dan leh dun ECI in a zamte zawm a ni em tih endik thin a nih thu a tarlang bawk.

He hunah hian Political party 2 atanga Electronic Media kaltlanga Political Advertisement tihchhuah tur, pre-certification dilna lut 12 te chu ECI in pre-certification tihna tura dan zawm tur a siamte hmangin uluk taka endik a ni a. Endik zinga a tam zawkah dan pela thil tih ngaihmawhawm a awm loh laiin, inkaihhruaina kalh hmuh chhuahte chu siamthat tura hriattir ni se tih a ni.

Media Certification and Monitoring Committee (MCMC) hi mumal takin District Election Officer kaihhruai District Level MCMC, Addl. CEO kaihhruai State Level MCMC leh CEO kaihhruai State Level MCMC (Appellate Committee) thlenga din fel vek tawh niin mumal taka kalpui a ni a. Candidate hming leh hamthatna tura advertisement siam reng rengte chuan chhuah phalna District Level MCMC hnenah an dil hmasa tur a ni a. Party leh pawl State Hqrs-a Political Advertisement atan erawh chuan Addl. CEO kaihhruai State Level MCMC ah dilna thlen tur a ni. Candidate/Party-te tan chuah hun tur thlen hma ni 3 ah dilna thehluh hman a ngai a, mimal/pawl tan erawh chhuah hun tur thlen hma ni 7 ah dilna thehluh hman a ngai thung. Heng dilnate hi ni 2 chhunga ngaihtuah zawh hman tur a ni. Chanchinbu (Print media) kaltlanga chhuah turte tan erawh vote thlak ni leh a hma chiah ni atan pre-certification hi tih a ngai a ni.