Mizoram Additional Chief Electoral Officer Pu Krishna Mohan Uppu, IAS chuan vawiin khan Lawngtlai tlawhin, Lawngtlai DC Conference Hall-ah Lawngtlai District election hotute leh nodal officer-te nen MP (Lok Sabha) Inthlanpui 2019 lo awm tur atana inbuatsaihna hrang hrang an thlir ho.

Addl CEO hi Officer on Special Duty (OSD) to CEO Pu Abhishek Kumar, IAS leh Deputy CEO Pu CC Lalchhuangkima, MCS te'n ṭawiawmin, Lawngtlai District Election Officer Pi Shashanka Ala, IAS leh official dangte'n an lo dawngsawng a. MP Inthlanpui atana Lawngtlai District inpuahchah dan hrang hrang lo hrilhfiah niin, hma sawnna tura rawtna hrang hrang pawh sawi ho a ni.

Pu Krishna Mohan Uppu chuan inthlan hmachhawn tura inpuahchah dan thlir ho chu hma sawn ngaihna lai zawn chhuah a, chumi atana thurawn inpekna tur a nih thu sawiin, inthlanpui lo awm tura mawh phurhna nei zawng zawng chu an chanpual ṭheuh ṭha taka hlen chhuah tum turin a chah a. MP chu Mizoramin seat khat chauh nei mah i la, sawrkar laipuia kan state pumpui ai awh tur an nih avangin ngaih pawimawh hle tur a ni tiin, mipui pawh MP inthlan pawimawhzia uar taka zirtir a, vote an thlak ngeina tura hma lak a ṭul, a ti a. Inthlan ṭhat ngai lo tura felfai taka inthlan buatsaih a nih theih nana ṭan la tur te, voter tam zualna polling station-a vote thlak hmanhmawh deuh tura hma la tur leh, MLA Inthlanpui 2018-a Lawngtlai District-a vote tla zat (81%) aia tam a tlak theih nana ṭan la turte'n kal khawmte chu a fuih a ni.

Lok Sabha Inthlanpui 2019-ah hian Lawngtlai District chhungah polling station 165 a awm dawn a. Chu'ng zinga polling station 8 chu hmeichhia chauh duty-na tur a ni.

Lawngtlai District Election Office chu felfai taka MP (Lok Sabha) Inthlanpui 2019 buatsaih tumin an inbuatsaih chho zel a. He inthlan hmachhawn tura tih tur pawimawh awmte pawh a theih anga tihfel nghal zel a ni.