India President -in June 4, 2009-a Joint Parliament Session-a a thusawiah tun kum 5 lo awm tur  kum 2009-2014 chhung hian India rama hmeichhia puitling tawh ziak leh chhiar la thiam lo zawng zawng ziak leh chhiar thiamtir vek tur a ni a lo tih, sawrkar laipui policy Women Literacy Programme beihpui thlakna bul tan nan leh he programme tulna mipui inhrilhhriatna hun atan September 9-14, 2009 chhung hi Adult Learners’ Week atan hman a ni dawn a. He Week hi Mizoramah chuan District headquarters tin Aizawl, Lunglei, Saiha, Lawngtlai, Serchhip, Champhai, Kolasib leh Mamit-ah hman tura tih a ni. Aizawl-ah chuan vawiin khan Archive Hall, Babutlang-ah September 9-14, 2009 chhunga Adult Learners’ Week hman tur hawnna inkhawm neih a ni a, Parliamentary Secretary, School Edn. Etc. Pu Chawngtinthanga chu Khuallian niin he hun hi a hmanpui a ni.

 

 

Khuallian Pu Chawngtinthanga, Hon’ble Parliamentary Secretary, School Education, etc. chuan Adult Learners’ Week hawnnaah thusawiin Mizoram chu Sap Missionary te zar zovin leh, Kohhran leh tlawmngai pawl hrang hrang te, zirtirtu leh mimal tlawmngaia inpete zarah ziak leh chhiar thiamah kan dinhmun a sang chho thei a ni, a ti a. Kum 2001 chhiarpui ang chuan Mizoramah ziak leh chhiar thiam lo mi 83,394 kan la awm thu te, hengho thiamtir nana theihtawp kan chhuah tlan a tul thu te, tun dinhmunah kan ziak leh chhiar thiam lo neihho hi kan unau Chakma leh Bru an tam ber a, a beih hna pawh chuti maia awlsam a nih loh tur thu te sawiin, a thiam tawh ten la thiam ve lote zirtir hi kan mawhphurhna a ni a, theihtawp chhuaha tangrual turin mipuite a sawm bawk a ni

Pu B.Lungmuana, Asst. Director, Adult Education chuan Adult Learners’ Week leh Women Literacy Programme chungchang  report  pein, sawrkar laipuiah chuan nimin 8.8.2009 International Literacy Day 2009 khan New Delhi-ah Women Literacy Programme hawnna Prime Minister hovin neih a nih tawh thu leh India ram State tinah Women Literacy Programme bul tan nan September 9-14, 2009 chhung hi Adult Learners’ Week atana hman tur a nih thu a sawi a. Women Literacy Programme hmalaknaah hian kum 2014 chuan India ram chu ziak leh chhiar thiam 80% kai chhohtir tum a nih thu leh, hmeichhia chauh ni lovin mipa ziak leh chhiar thiam lote pawh hmalak tel tur a nih tho thu te sawiin, kum 2001 chhiarpui ang chuan Mizorama ziak leh chhiar thiam lo la awm mipa 9.3% (35828) leh hmeichhia 13.3% (47566), an vaiin 11.2% a ni a; chu chu kan hmalakna tur a nih thu a sawi bawk a ni.

Adult Learners’ Week hawnna inkhawm hi Pu J.Hmingthanmawia, Addl. Deputy Commissioner, Aizawl District, Aizawl-in a kaihruai a, sawrkar laipui policy Women Literacy Programme hi hlawhlting taka Mizorama kalpui a pawimawh thu sawiin, kum 2001 chhiarpui khan Mizoram ziak leh chhiar thiam zat chu 88.8% a nih thu leh India rama pakhatna ni ngei tura tanlak a tul thu uar takin a sawi a. Hawnna inkhawmah hian ziak leh chhiar thiam lo, zir thiam ta mi pahnih Pi Lalremthangi Renthlei, Keifang leh Pi Lianbuangi, Saitual te chuan ziak leh chhiar an zir thiam dan leh an hlawkpui dan chanchin an sawi bawk a ni.    

Adult Learners’ Week kharna inkhawm hi Aizawlah chuan ni14.9.2009 khian Pu K.Riachho, IAS, Secretary, E&HRD (School Education) Department chu Khuallian atana hmangin hun hman leh tura ruahman a ni. Adult Learners’ Week hi District Headquarters dangah pawh hman a ni a, Lunglei, Kolasib leh Champhaiah chuan date 8.8.2009 International Literacy Day 2009 hman rual khan a hawnna neih nghal a ni a; hmun dang Serchhip, Mamit, Lawngtlai leh Saihaah chuan Adult Learners’ Week hawnna inkhawm hi  date 9.9.2009 hian hlawhtling taka hman theuh a ni bawk.