Department of Sports & Youth Services chuan ni 20 - 24 March, 2012 chhung hian Adventure Club hrang hrang leh School naupang te tan Vaipuanpho-ah Mizoram Adventure Festival a buatsaih a. He Festival hmang tur te chu tukin zing dar 7:20AM khan Sports Directorate Office kawtah Sports Minister Pu Zodintluanga’n a vailiam a ni.
Sports Minister chuan Festival hmang tur te chu mahni inthununna leh hotute thuawih tura fuihin adventure sports pawh chak taka kalpui zel a nih tur thu a hrilh a. Nakkum lamah pawh Festival puitham leh rafting programme buatsaih zel a ni ang, a ti.
He huna thusawitu dang Sports Secretary Pu R. Lalvena chuan adventure club member te chu khawtlanga mi tangkai tak tak an nih theih dan a sawi a ni.
Sports Directorate hmalakna peng pawimawh tak pakhat, thalaite nun kaihhruai nana thil tangkai adventure sports hi uar chho zel niin tun tuma Vaipuanpho-a Festival hmang tur Adventure Club 17 atangin mi 127 zet an tel ni. Thuang 2-ah inthenin, Vaipuanpho, Reiek tlang leh Ailawng ramah te rapelling, rope ladder climbing, jummaring, commando bridge, natural rock climbing, trekking, caving leh survival technique te an bei dawn a ni.
Tunlai hian adventure lamah chanchin lawmawm tak tak hriattur a awm chho zel a. Tun hnai ah pawh khan Oak Youth Adventure Club ami David Zohmangaiha chu khawvel tlang sang ber Mt. Everest lawnchhuak tur zingah thlan tel ve a ni a. Directorate of Sports & Youth Services chuan a tel theihna tura sum leh pai leh thil tul dang te a ngaihtuah sak a. Amah tawiawmtu tur Qualified Staff leh State Adventure Organiser ni bawk Pu Vanlalliana chuan Base Camp tawp ber thlengin a zui ang a, technical guidance leh support a pe dawn a ni.
Tarlan tawh angin Sports & Youth Services hian Director thar MCS officer Pu Lalzirmawia Chhangte a nei thar a. Amah hi adventure sports tui chilh mi tak, paramilitary force hnuaia adventure course training zo tawh a ni nghe nghe a ni.
